Isumaqatigiissummut USA suli atsioqataanngilaq

USA soorluuna Nunat tamalaat silaannarmik mingutsitsinnginnissamik Kyotomi isumaqatigiissutaannut atatillugu atsioqataanngissimaaginnarniartoq, naak USA nunarsuarmi nunat CO2-mik aniatitsinerpaat ilagigaluaraat. Tamanna erserpoq, Naalagaaffiit Peqatigiit sila pillugu Balimi ataatsimeersuarneranni.

Ataatsimeersuarnermi nunat toqunartulimmik CO2-mik aniatitsinerminnik qanoq millisaatigissanersut pillugu isumaqatigiissutissaq nutaaq piareersarneqaleruttorpoq, Kyotomi isumaqatigiissutissap ukiunik qulinik pisoqaassusillip taartissaa.

Amerikamiut naalakkersuisuisa isumaqatigiissutissap oqaasertai akuerisinnaanngilluinnarpai, tassami CO2-mik aniatitsinerup 2020-mi procentinik 25-t 40-llu akornanniittumik millilereersimanissaa piumasaqaataavoq. Piumasaqaat Kyoto-mi isumaqatigiissummit qaffasinnerungaatsiarpoq.

Buship naalakkersuisuisa kisitsisinik allassimasoqarnissaa kissaatiginngilaat, nunap aningaaqarnerata ineriartortinnera pingaarnerpaanerarlugu.

Kyoto-mi isumaqatigiissutip taartissaata nunanit atsioqataareersunit 37-nit akuerineqarnissaa ilimagineqarpoq, taakkununngalu USA ilaanngilaq.

Balimi sila pillugu ataatsimeersuarnermi isumaqatigiilluinnartoqarnissaa anguniarneqarpoq, taamaammat USA-p akuersitinniarlugu pinngitsaalinissaa qunugineqarpoq.

Kyotomi isumaqatigiissutip taartissaa sila pillugu ataatsimeersuarnermi tullermi Københavnimi 2009-mi pisussami allanngortinneqarsinnaavoq.