Isumaqatigiissummik allanngortitserusttut

Folketingimut ilaasortat arlallit Pituffimmi mittarfiup eqqaani saliinissamik isumaqatigiissutaasup nutaamik nalilerneqarnissaa maanna piumasarilerpaat.

Paasisat kingulliit ersersippaat mingutsitsineq ilimagisamit annertunerusoq.

Mittarfiup eqqaani saliinissaq Danmarkip isumaginiarlugu amerikamiunik isumaqatigiissuteqaraluarpoq. USA Namminersornerullutillu Oqartussat Dundasip nunatsinnut uterteqqinneqarnissaanik siorna isumaqatigiissuteqarput. Nalunaarusiap atuareernerata kingorna Venstremi avatangiisit pillugit oqaaseqartartup Eyvind Vesselbop, Keld Albrechtsenillu Enhedslistineersup, USA-mik isumaqatigiissutip nutarteqqinneqarnissaa piumasarilerpaat. Isumaqarput mingutsitsisut akiliisariaqartut, paasineqarmat akuutissat arrortikkuminaatsut, peqqinnissamut ulorianaatillit kræfteqalissutaasinnaasullu ukiut tamaasa 70 kg-lut mittarfeqarfiup qanittuanut immamut kuuttartut.

Folketingimut ilasortaq nunatsinneersoq Kuupik Kleist Inuit Ataqatigiinneersoq Folketingimi politikerit isumaqatigai, pingaarnerpaanerarpaali saliineq piaartumik aallarnerneqartariaqartoq.

- Isumaqarpunga isuma taanna tunngaviusumik eqqortuusoq, tassa mingutsitsisoq akiliisoq saliinermi. Danskit akiliiumareerlutik amerikamiunut neriorsuereerput, tamannalu aalajangiusimavaat.

- Pingaarnerpaajuvorli saliinissap piaartumik aallartinnissaa, kinaluunniiit akiliigaluarpat.

Saliinissaq 20 – 40 milliuuni koruuninik akeqaartussatut naatsorsorneqarsimavoq, uagulli siunnersortitta naatsorsorpaa 200 milliuuni koruuninik naleqassasoq, taannalu ajornartorsiutinngorsinnaavoq.  Folketingimut ilaasortaq IA-meersoq Kuupik Kleist Else Jensenimit aperineqarluni taama oqarpoq. Nunanut allanut naalakkersuisoq aamma IA-meersoq Josef Motzfeldt Folketingimi oqallinneq maanna akuliuffigerusunngilaa.