Oqaluttuarisaanitsinni suleqatigiinnissamik isumaqatigiissut Narsami ippassaq atsioqatigiissutigineqarpoq. Tassalu Narsap, Qaqortup Nanortallillu kommuniisa maajip aallaqqaataani 2009–mi kattunnissaannik imalik.
- Pingaarutilerujussuaq atsioqatigiissutigaarput. Politikkikkut suliassanik siunnersuutinillu kattunnissap tungaanut piareersaasussanik suleqatigiissitaliortoqassaaq aamma suleqatigiissitaq alla Allattoqarfiit suliassaannik tunngasunik sulisussaq pilersinneqassaaq, taakku annertuunik suliassaqarput, taama oqarpoq Kujataamioqatigiit siulittaasut Kiista P. Isaksen, Narsami aamma borgmesteriusoq, qasoqqagaluni nuannaaqisoq.
Ataatsimut kommuni siammagaassaaq pingasunik pingaarnerusunik illoqarfilik tamarmik naligiimmik aqutsisoqarfeqartussat.
Sulisut tamarmik atorfeqarnissartik qulakkeersinnaassavaat Kujataani kommunip iluani illoqarfimmut allamut nuunnerminni.
Aamma isumaqatigiissutaavoq Nunaqarfinni Aqutsisut ullumikkutut ataannassasut, periarfissaqassappulli nunaqarfiit imminnut qanittut kattuteqatigiinnissaminnut.
Aningaasanik atugassarititaasut iluanni, innuttaasunik kiffartuussinerit assigiinngitsut ajorseriassutaanngitsumik nalimmassarneqassapput. Aamma ataatsimut kommuninngornissamut akileraarutinut procenti naleqqussarneqassaaq.
