Isumaqatigiinniat Sermersuarmut
Kalaallit Nunaata EU-llu aalisarneq pillugu Ilulissani nutaamik isumaqatigiinniarnerit isummanik sakkortuunik oqalliffiusarlutik ilaatigut ingerlanneqartut, pinngortitami kusanaqisumi ulloq ataaserluunniit ilaatigut angalaarnermi, isummanik nutaanik immaqa pissarsiffiusinnaassagaluarnerput. Tamannalumi ullumikkut misilinniarneqarpoq.
Isumaqatigiinniartut katillugit 38-iusut Ilulissat avannaatungaani sermersuarmut Eqimut – nalunaaquttap akunneri pingasut missaat atorlugit angallammik orninneqarsinnaasumut – angalaarniarput. Takornariarnermut ilisimasalimmik peqataasoqassaaq, aalisarnermut tunngasut kisiisa eqqarsaatiginagit, peqataasut taamaalillutik sermimik aserortumik aamma takusaqarsinnaassapput.
Aalisarnermut isumaqatigiinniarnerit takornarniarnermi soorunami oqallisiginissaat inerteqqutaassagunanngilaq, aqaguli ulloq tassaassaaq pingaarutilimmik aalajangiuffiusussaq, isumaqatigiinniarfiusumi Hotel Arcticimi ulloq naavillugu isumaqatigiinniartoqassaaq, isumaqatigiittoqassappallu peqataasut amerlanersaat tallimanngorpat angerlakaaniartussaapput.
