Isumaqatigiinniarnerit ajalusoorput

Aningaaseriviit Kattuffiata Kalaallit Nunaannilu Sulisitsisut Kattuffiata isumaqatigiinniarneri ullumi ajalusoorput.

Aningaaseriviit Kattuffiat tassaavoq Kalaallit Nunaanni aningaaserivinni atorfillit tamarmik kattuffiat, aningaaserivinnilu sulisitsisut Kalaallit Nunaanni Sulisitsisut Kattuffiannit isumagineqartarput. Aningaasarsiat, soraarnerussutisiat sulinngiffeqartarnerillu ulluni pingasuni isumaqatigiinniassutigigaluarpaat, isumaqatigiinngitsoorpulli.

- Aningaaserivimmi Grønlandsbankimi sulisut agguaqatigiissillugu 1 million koruuninik aningaaserivimmut siorna isertitsigaluartut, uagut nammineq isumarput malillugu naammaginartumik neqerooruteqaraluarpugut. Tassa sulisut aningaasarsiaat 8,6 procentimik ukiuni tulliuttuni pingasuni qaffanneqassasut. Kalaallit Nunaanni Sulisitsisut Kattuffiata 5,5 procent taamaallaat neqeroorutigigaluarpaa taavalu 10.000 koruunit ataasiarlutik tunniunneqassasut, tamannali akuerineqarsinnaanngilluinnarpoq, Aningaaseriviit Kattuffiani isumaqatigiinniartoq, Kent Petersen oqarpoq.

Kalaallit Nunaanni Sulisitsisut Kattuffianni pisortap, Ole Rudip, isumaqatigiinniarnerit ajalusoornerat uppernarsarpaa, allamilli oqaaseqarumanani.

Illuatungeriit naapeqqinniartussaassapput, taamanikkumullu isumaqatigiissinnaanngippata, aningaaserivimmi sulisut upernaaru apriilip ulluisa aappaanniit suliumajunnaarnerannik tamanna kinguneqarsinnaavoq.