Isumaqatigiinngittuarsinnarput

Westripip Greenland Minerals and Energymut isumaqatigiissumminiit ilaajunnaarniarluni siusinnerusukkut nalunaarutini sapaatit akunnerani kingullermi tunuartikkumanngikkaa, Greenland Minerals And Energyp pisortaa, Roderick Mcillree, aningaasanut nioqquteqartarfimmut Sydney børsenimut oqarpoq.

Paasissutissat aningaasallu pillugit suliffeqarfiit taakkua marluk isumagiinngissuteqarput.

Westrip aningaasartuutit ilaannik akiliisannginerarlugu GME-mit pisuutinneqarpoq.

GME-lu Kuannersuarni aatsitassarsiornissamut suliami paasissatissat isertuukkai, Westrimit pisuutinneqarluni.

Westrip suleqatigiinnissamik isumaqatigiissummit tunuarniarlugu nalunaarnera inatsisinik unioqqutitsinerusoq, GME-p pisortaa Roderick Mcillree isumaqarpoq.

Taamaammat Westripip pasilliilluni iliuusaa eqqartuussissut aqqutigalugit GME-p illersorniarlugu piareersimanerarpoq.

Suliffeqarfiit marluk suleqatigiinnissamik isumaqatigiissutaata Joint Venturep atuunnera aggustip ulluisa aqqarngani siullermeerluni Westrip uppernarsarumanagu nalunaarutigaa.