Isumaqatigiiginnartoqarsinnaanngitsoq ullumikkut takutippaat

Naalakkersuisoqatigiit nutaarluinnaat isumaqatigiiginnartoqarsinnaanngitsoq ullumikkut takutippaat.

Naalakkersuisoqatigiinngortut Siumut aamma Atassut qajannartutut inissisimapput, tassami illuatungiliuttunit ataasiinnarmik amerlanerussuteqaramik. Tamanna pissusissamik malinneqqissaarnissamik pisariaqartitsivoq tamannalu ersersinniartuassavarput, ullumi naalakkersuisoqatigiinngortut ilisaritinneqarneranni taama oqarpoq Siumup siulittaasuata tullia, Inatsisartullu siulittaasuat Jonathan Motzfeldt.

Kisianni sulisartut ulluanni, ullumikkut maajip aallaqqaataani, naalakkersuisoqatigiit atuutilerfianni, qanoq pissusilersortoqassanersoq isumaqatigiissutigineqarsimanngilaq.

Inatsisartut, pilersaarutit naapertorlugit aqagu ataatsimiinnerminnik naammassinnittussat, suliassaminnik kinguaattooqqajaallutik ingerlammata ualeq manna atorluarniartussaagaluarpaat. Kisiannili taama pisoqanngilaq.

IA-mit siunnersuutigineqarpoq Inatsisartuni ilaasortat maajip aallaqqaataasiorlutik ataatsimiinnatik oqalugiartunik tusarnaariassasut. Tamanna Siumumit isumaqatigineqarpoq – kisianni naalakkersuisooqataasut Atassutikkut tamatumunnga isumaqataanngillat.

- Isumaqarpunga ulloq nalliussillugu maani ataatsimiittarfimmi suliavut ingerlatiinnassagivut, Augusta Salling kajumissaarivoq. Taamatulli kajumissaarinera amerlanerusunit malikkumaneqanngilaq.

Inuit Ataqatigiit aamma Siumut Inatsisartut ataatsimiinnerata ualimut unitsinneqarnissaa isumaqatigalugu taasipput, kisianni Atassut taaseqataanngilaq. Demokraatillu akerliullutik taasipput. Tassami taakkua ualeq manna oqallisigitittussaagaluarpaat “demokrati pillugu apeqquteqaat aallaavigalugu oqallinnissamut siunnersuut”. Tamannali pissutigalugu itigartitsinngillat, itigartitsissutigaalli partip ilaasortai isumaqarmata ualimut ataatsimiinnissap kinguartinneqarnera akisoorujussuanngorsinnaasoq, tassami tamatuma upernaakkut ataatsimiinnerup sivitsorneqarnera kingunerisinnaammagu – taamalu pisoqarpat timmisartunut bilitsit allanngortitertariaqalissammata.

Kisianni Inatsisartunut ilaasortat tassa ualimut ataatsimiinnatik maajip aallaqqaataasiorput taavalu suna nalliuttorsiussanerlugu nammineerlutik aalajangersinnaavaat.

Inatsisartut ualimut ataatsimiinneranni oqaluuserisaq ataasiinnaq oqaluuserineqarpoq tassalu naalakkersuisunut ilaasortanngortut nutaat marluk akuersissutigigamikkik, tassaasut Lars-Emil Johansen aamma Ark’alo Abelsen. Taakkua 16-init qinerneqarlutik akuerineqarput illuatungiliuttullu taaseqataanngillat.