Isumannaatsuunissaq sillimaniarnerlu pillugit tusarniaaneq
Tamanna folketingimi ilaasortat Sofia Rossenip aamma Høgni Hoydal-ip Atlantikup Avannaani Suleqatigiinneersut suliniuteqarnerisigut pissaaq. Saqqummiussisussallu ilaatigut tassaassallutik Naalakkersuisut siulittaasuat Kuupik Kleist aamma Svalimmiormiut nunanut allanut ministeriat Jørgen Niclasen.
Nunatta folketingimut ilaasortaatitaata aappaa Lars-Emil Johansen aamma peqataassaaq.
Tusarniaanermi politikerit immikkullu ilisimasallit Danmarkimeersut, Islandimeersut Norgemeersullu, Nunatta Savalimmiullu, silap pissusaata allanngoriartornerata kinguneranik unammilligassaat periarfissaallu kiisalu tamaani isumannaallisaanissamut isumagisassat nutaat saqqummiutissavaat.
Illersornissamut ministereqarfik peqataassaaq, soorlu aamma Kangilinnguani sakkutooqarfik kiisalu immikkut ilisimasallit Islandimeersut Norgimeersullu aamma qaaqquneqarsimasut.
Tamakkua saniatigut Folketingimi illersornissamut ataatsimiititaliameersunik, NUnatsinnut Savalimmiunullu ataatsimiititalianeersunik, Nunanut allanut ataatsimiititaliameersunik, aamma Danmarkimi Folketingip Nunat avannarliit Siunnersuisoqatigiivinut ilaasortasatitai peqataassapput.
