Isumannaatsumik atoqateqarnissamut tunngasumik nittartagaqalerpoq
Usuup puua qungujulasoq, ‘Iggu’-mik taaguutilik iluaqutsiullugu inuusuttut kissaatiginngisaminnik naartulersoorsinnaanerannut kinguaassiuutitigullu nappaatinik tunillatsinnissaannut illersussavai. Iggu tassaavoq nittartakkami Iggu.gl-imi, pinaveersaartitsinermik suliaqarfiup Paarisap ullumikkut ammagassaani pingaarnertut inuttaritinneqartoq.
Allattoq Louise M. Kleemann
novembarip 27-at 2008 11:43
Inuusuttuaqqat Iggu.gl-imi usuup puuinik akeqanngitsunik piniarsinnaapput. Usuup puuilu nassiussisut kinaassusaat isertorlugu inniminniisunut nassiunneqartassapput. Usuup puuisa saniatigut inuusuttuaqqat ‘Iggu’-mik ilisarnaatilinnik plakaatinik, postkortimik, matuersaataasivinnik usuup poortalinnik, saqqarmiuaqqanik allanillu piniarsinnaapput.
Nittartakkami Iggu.gl-ikkut inuusuttut isumannaatsumik atoqatigiinnermik paasisimasaqalernissaat siunertaavoq. Nittartagaq ineriartortinneqartuassaaq, siunissamilu paasisitsiniaanermi eqqaasitsissutigineqartassalluni.
