Isumannaallisaanermut akisussaasoq oqaaseqarusuppallaanngilaq

Namminersorlutik Oqartussani kalerrisaarutit piffissani kingullermi iluaqutaagaarsimanngillat. Tillinniarnerit marluk marlunngornerup unnukkuani pingasunngornerullu ullaassaani pisimapput. Siullermik igalaaq sequmillugu Inuussutissarsiornermut Sulisoqarnermullu Naalakkersuisoqarfik tillinniarfigineqarpoq. Unnuallu ingerlanerani Inuussutissarsiornermut Sulisoqarnermullu Naalakkersuisoqarfik tillinniarfigineqaqqippoq.

Namminersorlutik Oqartussani isumannaallisaanermut akisussaasoq Daniel Gottrup oktobarip 24-ani apersorneqarami neriorsuivoq isumannaallisaaneq pillugu iliuuseqarumaarlutik, imalu oqarpoq:

- Namminersorlutik Oqartussani allaffiit tamarmik qanoq isumannaallisarneqarsinnaanersut eqqartussuarput, tassami pisup uuma takutikkamiuk taama pisoqarsinnaassappat isumannaallisaaneq pitsaanerpaaffissaminiinngitsoq, Daniel Gottrup sapaatit akunneri tallimat matuma siorna oqarpoq.

Namminersorlutik Oqartussani isummannaallisaanermi akisussaasoq Daniel Gottrup ullumikkut oqaaseqarusuppallaanngilaq:

Paasisinnaaviuk inuit amerlasuut tupigusummata sapaatip akunneri tallimat ingerlanerini pingasoriarluni tillinniartoqarmat, kalerrisaarutillu aallarsimanngimmata?

- Aap paasisinnaalluarpara. Neriuppugut uani sapaatip akunnerata naanerani imaluunniit sapaatip akunnerata tulliata aallartinnerani paasissutissanik tunisisinnaassalluta, Daniel Gottrup oqarpoq.

Kalerrisaarutit aallarsimanngitsut vicepolitikommisærip Carl Sværdip ullumi uppernarsarpaa.

Angutit inuusuttut marluk tillinniarnermut atatillugu politiinit ujaarineqarput, taakku 20-t 25-llu akornanni ukioqarput. Nuummi Politiit saaffigineqarsinnaapput, oqarasuaat 32 14 48  atorlugu, politeeqarfimmulluunniit nammineq saaffiginnittoqarsinnaavoq.