KNAPK-p uparuarpaa nunatta imartaani uuliamik maqisoorsinnaaneq aalisartaffinnut ajunaarnersuartut ittumik sunniijumaartoq.
Ukiut 21-t matuma siornagut assartuutip Exxon Valdezip Alaskap eqqaani uuliamik ajutoornersua kattuffiup eqqaamaqquaa, taamani Alaskap kangerliumanersuani aalisakkat peerummata akissarsiutigalugulu aalisarneq suli pilerseqqinneqarsimanani, naak uuliamik ajutoorneq ukiut 21-t matuma siornagulli pisimagaluartoq.
- Manna tikillugu nunatta aningaasarsiornikkut isertitsissutigisartagai tassatuaapput imaani uumassusillit, qularutissaanngilarlu uuliamik maqisoorneq Sarfaq Kissartoq aqqutigalugu siaruaakkumaartoq. Taamatut pisoqassappat tamanna avatangiisitigut imaannaanngitsunik kinguneqassaaq ullumikkut takorlooruminaatsitatsinnik, KNAPK-p siulittaasu Leif Fontaine allappoq.
SIK-p siulittaasua Jess G. Berthelsen qanittukkut taamaangajattumik aamma nalunaaruteqarpoq. Taassuma piumasaraa Kalaallit Nunaanni uuliasiorneq aallartinneqartinnagu Naalakkersuisut ajunaarnersuaqaratarsinnaanera pitsaanerusumik upalungaarsimaffigissagaat, naammagittaalliuutigalugulu Kalaallit Nunaanni kommunini tamani upalungaarsimanissamut piumasaqaatit minnerpaaffilernissaat Naalakkersuisunit aalajangersarumaneqanngimmat.