Isumannaallisaaneq mittarfeqarfinnut akisuvoq
- Isumannaallisaanissamut piumasaqaatit sakkortusiartuinnarnerat malugaarput, Niels Kreutzmann oqarpoq.
Aningaasat ukiumut 5 aamma 10 millionit koruunit akornanniittut Mittarfeqarfiit Kangerlussuarmi mittarfinnilu allani isumannaallisaanermut atortarpai.
Nunani tamalaani mittarfinni isumannaallisaaniarnerit USA-mi septembarip aqqarnanni 2001-imi peqqarniisaarniartoqarnerata kingorna annertusarneqarput, Nunatsinniillu Europaliarlutik angalasut Mittarfeqarfinniit sakkortunerusumik isumannaallisaavigineqalerlutik.
- Kalaallit Nunaanniit Danmarkimut timmisartuussinerni isumannaallisaanermut piumasaqaatit piffissami kingullermi sukateriffigineqarput, EU-mi piumasaqaatit malinneqartussaammata, Niels Kreutzmann oqarpoq.
- Qinnguartaalluni misissuinermut atortunik 2 millionit koruuninik nalilinnik taamaammat qaammatini makkunani pissarsiuleruttorpugut. Atortullu taakku Kangerlussuarmi Narsarsuarmilu atorneqartussaapput, Niels Kreutzmann oqarpoq.
Københavnimi Kastrupimi timmisartoqarfimmi, Danmarkimi timmisartoqarfiit annersaanni, isumannaallisaanermut aningaasartuutit 2001-imi 98 millionit koruunioriarlutik 2010-mi 437 millionit koruuninut qaffassimapput.
Timmisartoqarfimmilu isumannaallisaanermut sulisut ukiut qulit ingerlaneranni 320-niit 873-inut amerlisimallutik.
Isumannaallisaanermik suliallit 20-t Kangerlussuarmi maanna sulisorineqarput, isumannaallisaanerillu annertusarneqarsimanerisa saniatigut Mittarfeqarfiit aamma nakkutigineqarnerulernikuullutik.
- Sulisut amerlanerusunik maanna aamma aqqusaagassaqalernikuupput, soorlu aamma ilaasut taamaattariaqalernikuusut. Amerlanerusunik sulisoqartariaqalissaagut, soorlu aamma mittarfiit allilerneqartariaqassasut, Mittarfeqarfinni pisortaq Niels Kreutzmann oqarpoq.