Isumaliutissiissut amigartumik saqqummiunneqartarpoq
Namminersorneq pillugu paasissutissiinerit annertuut siullersaat taamaalilluni pivoq. Namminersorneq pillugu isumalioqatigiissitap ukiuni sisamani suliaa suli innuttaasunut amigartumik maannamut paasissutissiissutaasarsimasoq, Ilisimatusarfimmi ilinniartut ilaannit oqaatigineqarpoq.
Allaffissornermik ingerlatsinermut ilinniartoq Niels Thomsen isumaqarpoq, ukioru taasisoqartinnagu paasisitsiniaalluarnissaq pingaaruteqartoq:
- Politikerit taqqamani assigiinngitsunik nalunaaruteqarput, soorlu assersuutigalugu siulittaasup tulliata Christian Mejdahlip oqariartuutigivaa, suliaminni siunertariaqartartoq tassaasoq kalaallit qallunaallu naalagaaffeqatiginnerata inerisarnissaa, Niels Thomsen aallartippoq.
Ataatsimiititaliarsuup suliaq naammassisaa kalaallit danskillu naalagaaffeqatigiittut immaqa aamma siunissami imminnut qaninnerulernerannik kinguneqartussatut paasineqarsinnaasoraa.
- Illuatungaanili Johan Lund Olsenip oqariartuutigaa, suliap naammassinera tassaasoq namminiilivinnissamut alloriarneq siulleq, oqarpoq.
Oqariartuutit illuatungeriit marluk taakku ataqatigiinngitsutut isigigamigit Katuami apeqquteqaateqarpoq.
- Erseqqinngitsumik avammut oqariartuutit taakku nalunaarutigineqartartut tusarnaartartunit atuartartunillu piffissap ingerlanera paatsiveerutsitsisinnaammata erseqqissaaqqusivunga. Maannakkumummi takusinnaasagut malillugit killeqartorujussuarmik paasisitsiniaaneq ingerlasimavoq, Niels Thomsen oqarpoq.
Ataatsimiititaliarsuup maannamut paasisitsiniaavallaarsimannginneq ilaatigut qanittukkut aatsaat atsioqatigiinnerit pisimanerannik tunngavilersoraa oqaatigaa.
- Novembarimi taasisitsinissamut piffissaq sivikitsuaranngorpoq. Eqqartorneqartut qitiusorujussuit naammaginaannartumik avammut nassuiaassutigineqarnikuupput, taamaattumik pissusissamisoorsorigaluarpara tamakku erseqqissumik avammut nalunaarutigineqarnissaat.
Niels Thomsen Katuami apeqquteqareerluni taama radioavisimut nassuiaavoq.
Katuami saqqummiussineq nalunaaqutaq marluk qeqqanut nangissaaq, tassani nunanut allanut tunngassuteqartut Inuit Ataqatigiinneersup, Johan Lund Olsenip saqqummiutissallugit.
Lars-Emil Johansen, Siumumeersoq, kalaallit inuiaat, oqaatsit, Kalaallit Nunaatalu siunissami naalagaaffittut namminersulersinnaanera pillugit saqqummiussissaaq. Innuttaasut novembarimi taasisinneqareerpata pilersaarutaavoq Namminersorneq inuiattut ullorsiornitsinni aappaagu juunip 21-anni, atuutilissasoq.
