Isumalioqatigiissitaq: Umiarsuakkut angallanneq matusiuk

Qaqortumiit Ilulissat tungaanut umiarsuarmik angallassisarneq siunissami atuutiinnassanersoq pillugu apeqqut Assartuineq pillugu isumalioqatigiissitamut Naalakkersuisut suliareqquvaat.

Arctic Umiaq Linep umiarsuaataa ilaasartaat Sarfaq Ittuk Qaqortumiit Ilulissat tungaanut 1997-imili angallassisalerpoq, ilaasulli ikiliartuinnarput, umiarsuaatileqatigiiffiullu nalunaarutigaa, pisortanit tapiiffigineqanngikkunik angallassisinnaajunnaarlutik.

Tapiiffigineqarnissaali politikkikkut kissaatigineqanngilaq.

Taamaammat aqqutip taassuma atorunnaarnissaa piviusunngorpoq. Apeqqutaalerporli tamanna qanoq sukkatigisumik pissanersoq.

Periarfissat pingasut isumalioqatigiissitap taakkartorpai: Siullermik: Sukkanerpaamik pisariaqarpoq. Aappaattut: Umiarsuaq pisoqaivallaarpat - immaqa ukioq 2016-imi, pingajuattullu: Timmisartunut mittarfik Qaqortumi naammassippat.

Narsarsuarmimi timmisartunut mittarfik Qaqortumut nuunneqassasoq ippassaq Radioaviisimi oqaluttuaraarput.

Taamatut aaqqiinissamik isumalioqatigiissitap aalajangernera tassa sallersaavoq. Tassa aqqutip sukkanerpaamik matuneqarnissaa, 2010 naariarpat.

Assartuussineq pillugu isumalioqatigiissitap innersuussutai Naalakkersuisut tigoreeraluarlugit nalunaareerput Arctic Umiaq Line amigartooraluarpalluunniit 2011 tamaat angallassisinnaasoq. Taama Naalakkersuisut siulittaasuata Kuupik Kleistip oqarnera Nuuk TV-mi aggutsip naanerani erserpoq.

Isumalioqatigiissitap oqarnera naapertorlugu angalasut amerlanersaasa timmisartumik qulimiguulimmilluunniit angalarusunnerunissaat ilimagineqarpoq. Angalasartulli 10 procentiisa missaat ukiumut ataasiarlutik nunaqarfiliartarput, nunaqarfiillu ilaanni timmisartoqarfeqarnanilu qulimiguulimmut mittarfeqanngilaq, taakkununngalu angallassisarnissamut nutaamik aaqqiisoqartariaqarpoq.

Angalasut 20.500-ngajalluinnaat Sarfaq Ittummut siorna ilaasimapput.