Isumalioqatigiissitaq: Mittarfissaq tallineqarsinnaassaaq

Kujataani aatsitassanik piiaaniarnermi politikikkut aalajangiinerit apeqqutaallutik, Qaqortumi timmisartoqarfissap qanoq takitiginissaa aalajangerneqartussaassoq, Assartuussineq pillugu Isumalioqatigiissitap siulittaasua Chresten Sørensen oqarpoq.

Qaqortumi mittarfiliortoqassappat maanngagaaq siunnersuutigineqarpoq mittarfik 1199 meterinik takitigissasoq. Kujataani aatsitassanik piiaaneq ingerlallualerpat mittarfiup tallineqarsinnaanera eqqartorneqarsinnaasoq, Chresten Sørensenip oqaatigaa:

- Aatsitassarsiorneq annertusissappat angallanneq annertusisussaassaaq taamaammallu mittarfik takisooq orniginarnerussagaluarluni. Aatsitassanik piiaaniarnermi aatsitassat uranimik akullit piiarneqannginnissaannik isumaqatigiinnerup, mittarfimmik naatsumik sanaartornissaq orniginarnerugallarpoq, taamaattumillu Isumalioqatigiissitamik kissaatigaarput, mittarfik sananeqassasoq talliseriaannanngorlugu, Chresten Sørensen oqarpoq.

1199 meterisut takitigisumik mittarfiliortoqassappat aningaasartuutit katillugit 600 millionit koruunit missaanniissapput. Takinerusumik sanaartortoqassagaluarpat aningaasartuutit 1 milliard koruunik sinneqalaassallutik.

Assartuussineq pillugu Isumalioqatigiissitap naatsorsuutai malillugit, takinerusumik mittarfiliortoqassagaluarpat inuit atuisut amerlanerit isaatitsissutaasinnaagaluarput, taamaalilluni piffissaq ungasinnerusoq isigalugu imminut akilersinnaanerussagaluarluni.

- Uanga nammineerlunga kissaatigisinnaagaluarpara mittarfimmik takisuumik sanasoqarnissaa, uangali tamanna aalajangersinnaanngilara, neriuinnassaanga Kujataani aningaasarsiorneq ilorraap tungaanut aallassasoq, taamaalippat takisuumik mittarfiliortoqarsinnaalissammat, Chresten Sørensen oqarpoq.

Mittarfimmik takisuumik naatsumilluunnit Qaqortumi sanaartortoqarpat kujataani aningaasarsiorneq ilorraap tungaanut aallassasoq Chresten Sørensen isumaqarpoq.

Maannakkut Narsarsuarmi mittarfiusoq inuiaqatigiinnut akisuallaartoq Chresten Sørensenip eqqaavaa, tassami mittarfik inoqarfinnut ungasippallaarami.

Narsarsuup mittarfia takisuupilussuuvoq, soormita taassuma ineriartortinnissaa siunniunneqarsimangila?

- Narsarsuup inissisimanera ajornartorsiutaavoq tassami inoqarfinnit ungasissumiikkami. Uagullu naatsorsuinitta takutippaat imminut akilersinnaanerusoq Qaqortumi mittarfilioraanni, tamannalu inuiaqatigiinnut aamma akikinnerussalluni, Chresten Sørensen naggasiivoq.