Isumalioqatigiissitaq digitaliseeriinissamut KNR-imut aningaasaleeqqusisoq
Saammaateqatigiinnissamik Isumalioqatigiissitap isumaliutissiissumminni tamanna siunnersuutigaa.
Aallakaatitat qanga inooriaasitoqamut, nunatsinni politikkip ineriartorneranut kulturimullu tunngasut allarpassuillu inuiaqatigiinnit internetti aqqutigalugu sukkanerpaamik atorneqarsinnaaleqqullugit digitalisereerneqarlutik aallarteqqinneqarsimalerput.
Toqqorterinerlu nukingiuttariaqartoq, Karl Henrik Simonsen, KNR-ip pisortaa, isumaqarpoq.
- Båndit utaqqisiinnarlugit parnguttarput nipaalu ajortillutik assiliartai ajorlutik, massakkut båndit ilaat tigusartakkagut nutarterniakkagut aseroreersimapput, taamaammat pingaaruteqarpoq qanittumi sukkasuumillu isumagineqarnissaa, Karl Henrik Simonsen oqarpoq.
Ukiut 15-it
Digitaliseeriisut ullumikkut marluupput. Taamali suleriaaseqaannassappata, ukiut 15-it tungaanut sivisutigisumik toqqorterisoqassaaq.
Toqqorterinerli sukkaneruleqqullugu atortutigut periarfissanik allanik KNR misissuivoq.
KNR nunatta karsianit 67,9 mio. koruuninikukioq manna aningaasaliiffigineqarpoq. KNR-ili naammattusaarisarsariaqarpoq pingaarnersiuillunilu. Taamaattumillu qaavatigut aningaasaliisoqarpat digitalinngorsaaneq sukkanerulersinnaammat, KNR-ip pisortaata aningaasaliinissamik inassut - tupaallannanngitsumik - ilalerpaa.
- Nunarput tamaat aammalu oqaluttuarisaanerput eqqarsaatigissagutsigu pingaaruteqarluinnarpoq raatiup Kalaallit Nunaatalu ineriartornera toqqortaatigissallugu, Karl Henrik Simonsen oqarpoq.
Eriagisat nalillit
Assitoqqanik toqqorterinissaq pingaaruteqartoq, Kultureqarnermut Ataatsimiititaliami siulittaasup, Mimi Karlsenip, oqaatigaa.
- Immiussat nutaanngitsut isumaqarpunga nunatsinni eriagisassatut aammalu pigiuaannagassatut naleqartorujussuusut.
Digitaliseeriisoqarnissaanulli aningaasaliisoqarnissaa neriorsuutigisinnaanagu oqaatigaA.