Isumalioqatigiissitap suliassai tulliit
Kalaallit danskillu namminersorneq pillugu isumalioqatigiissitaata nunatta namminersulernissaanik suliniuteqarnermini akornutaasinnaasut maanna iliuuseqarfiginialerpai. Isumalioqatigiisitat Narsami juunip qaammataani tullianik ataatsimiilerunik namminersulernissaq pillugu inatsisissatut siunnersuutit eqqartussavaat. Isumalioqatigiissitat siulittaasuata Jonathan Motzfeldtip ataatsimeereerlutik kalaallit danskillu 16-t ataatsimiinnermi peqataasut iluarisimaarinninnerat malugisinnaanerarpaa:
- Nunanut allanut attaveqarnerup sillimanissarlu pillugu apeqqutit aaqqiiffigineqarnissaanik ippassaq ataatsimiinnitsinni akaareqatigiilluta immitsinnut oqaloqatigiippugut, Jonathan Motzfeldt oqarpoq.
Nunarput nunanut allanut nammineerluni attaveqartalissanersoq aperingatsinni ima akivoq:
- Nunanut allanut attaveqartarneq nunanut allanut ministereqarfiup ministerillu suliassaraat, nunatsinniilli kissaatigaarput soqutigisagut aallunniarlugit nunanut allanut attaveqartarnerup sillimanissarlu pillugu apeqqutini oqartussaaffeqarnerulernissarput, Jonathan Motzfeldt taama akivoq nangillunilu.
Assersuutigalugu aalisarnermi, nunat tamat niueqatigiiffiannik suleqateqarnermi, Atlantikup Avannaani miluumasut imarmiut pillugit Kommissionimi suliniarnermi soqutigisagut ingerlassinnaanisaagatsigit oqartussaaffeqarnerulernissarput anguniarparput.
Tamakku tamarmik aningaasanik naleqassanersut aperingatsinni Jonathan Motzfeldt ima akivoq:
- Namminersulernissatsinni ataatsimoortumik tapiissutaasartut qanoq pineqassanersut aamma eqqartukkatta ilagivaat. Ataatsimoortumik tapiissutaasartut amerlineqarnissaat ilimaginngilara ilimagineruarali ullumikkutut amerlatigiinnarnissaat. Nunatta namminersuleruni aningaasaqarnikkut namminiilernissaa siunertaraarput, Jonathan Motzfeldt taama naggasiivoq.
Namminersorneq pillugu isumalioqatigiissitami Jonathan Motzfeldt siulittaasunngunngitsiarluni aningaasaqarneq inuussutissarsiutinillu ineriartortitsineq pillugit ataatsimiisitaliami siulittaasuuvoq. Inatsisit pillugit ministeriusimasoq Frank Jensen maanna ataatsimiititaliami tassani siulittaasunngorpoq.
