Isumalioqatigiissitap innersuussutai oqallisigaat

Isumalioqatigiissitap siunnersuutai politikerinit maannamut annerusumik oqaaseqarfigineqanngikkaluarput.

Oqallinnermi Siumut partiini kisiartaalluni peqataanngilaq, partiilli naalakkersuisuutitaqartut aamma Atassutip annerusumik akileraartarnermut ilinniartitaanermullu suliniutissatut pingaartitatik tikkuartoraat, Sermitsiap nittartagaani allaaserineqarpoq.

Naalakkersuisut siulittaasuata akileraartarnermut politikip pingaaruteqassusia erseqqissarpaa.

- Isertitat akileraarusigaanngitsut sammisariaqarpavut, tamannami siusinnerusukkut oqaluuseriumaneqanngitsunik ilaqarmat, Kuupik Kleist oqarpoq. Taassuma immikkut ittumik aaqqissuussinerit ataatsimoortunut ataasiakkaanut tunngasut pinnagit, akileraartarnikkut atugarissaarnikkullu aaqqissuussinerit piumaneruai. Tamakkumi nakkutigiuminarnerummata.

Demokraatit siulittaasuata Jens B. Frederiksenip inuiaqatigiit ineriartornissaannut imminullu napatinnerulernissaannut ilinniartitaanerup qaffassarneqarnera pisariaqarnerarpaa. Aamma isumalioqatigiissitap isumaginninnikkut ikiorsiisarnermi periaatsit allangortinneqarnissaannik innersuussutai taperserpai.

- Sulineq aamma akilersinnaasariaqarpoq. Taamaattumik isumaginninnermi ikiorsiissutit annerpaamik SIK-p isumaqatigiissutai naapertorlugit akissarsiat 80 procenterisariaqarpai, Jens B. Frederiksen oqarpoq.

Kattusseqatigiit Partiiata siulittaasuata Anthon Frederiksenip ilinniartitaaneq aamma sammivaa. Taanna isumaqarpoq ilinniartitsisut atuartitsinerulernerisigut meeqqat atuarfiat pitsanngorsarneqarsinnaasoq.

Nunatta suliffeqarfinnut avataaneersunut pilerinarnerulernissaa, Atassutip erseqqissarpaa.

- Taamaattumik uuliasiortitseqatigiiffiit aamma Alcoa sukkanerusumik ammaffigisariaqarpavut, taakkumi SIK-p isumaqatigiissutaanik akissarsialinnut hunnorujulikkaanut suliffissaqartitsilersinnaammata, siulittaasup tullia Siverth K. Heilmann oqarpoq.

Oqallinnermi Sulisitsisut Peqatigiiffiata oqallitsitsisutut, Namminersorlutik Oqartussat piffissami qaninnermi ileqqaaruteqarniaannarlutik suliffeqarfinnik Nunatsinneersunik tunulliutitsillutik Nunatta avataaneersunik salliutitsinerarlugit isornartorsiorpai.

Sinniisuutitat ataatsimiinneranni Henrik Sørensen Sulisitsisut Peqatigiiffianni ukiuni tulliuttuni marlunni siulittaasutut ingerlaqqittussatut qinigaaqqippoq.