Isumaginninnermut tapiissutit annertussusaat allannguuteqarpiarsimanngillat
Isumaginninnermut tapiissutit annertussusaat nunatsinni allannguuteqarpiarsimanngitsut, Kalaallit Nunaanni naatsorsueqqissaartarfimmi naatsorsuinerit kingulliit takutippaat.
Aningaasartuutit 1999-miit 2004-p tungaanut sanilliunneqarsimapput, tassani utoqqalinersiutilinnut tapiissutit, pisariaqavissumik ikiorsiissutit, napparsimanermi annertussusileriikkamik ikiorsiissutit, suliffissaaleqinermilu annertussusileriikkamik ikiorsiissutit misissorneqarsimallutik.
Aningaasartuutit 600 millioni koruunit ataatilaaqqavai, ukiullu arfinillit kingulliit taamatut inissisimasimapput, tapiissutaasartut ataasiakkaat allannguuteqalaartarneri annikitsualuit eqqaassanngikkaanni.
Assersuutigalugu pisariaqavissumik ikiorsiissutit 2003-miit 2004-mut apparialaarsimapput, 2000-p kingorna aatsaat appariarfiulluni.
Suliffissaaleqisuni annertussusileriikkanik ikiorsiissutit ukioq kingulleq aamma apparsimavoq, akerlianilli napparsimanermi annertussusileriikkanik ikiorsiissutisisut amerlerialaarsimallutik.
