Assi: Foto: KNR

Niisip: Isumaginninnermut siunnersortit qassiuneri ilisimaneqanngilaq

Nunatsinni tarnip pissusaanik ilisimasallit imaluunniit isumaginninnermut siunnersortit qassit pisariaqartinneqarnersut erseqqissumik ilisimaneqanngilaq. Isumaginninnermut siunnersortit qasserpiaanersut aamma ilisimaneqanngilaq.

Tarnip pissusaanik ilimasallit qassit nunatsinni sulinersut qassillu pisariaqartinneqarnersut ilisimaneqanngilaq. Sapaatit akunnerata siuliani sisamanngornikkut saqqummiunneqarpoq.  

Massakkullu aamma erserpoq isumaginninnermut siunnersortit qassit maani nunatsinniinnersut aamma ilismaneqanngitsoq.  

- Akiuminaatseqaara, tassami tamakkerlugu isiginninnikkut takusinnannginnatsigu, tassami misissornikuunnginnatsigu, Ida Abelsen-Hansen, Niisip-imi nunatsinni isumaginninnermut siunnersortit peqatigiiffianni siulittaasoq, oqarpoq.

AAMMA ATUARUK Tarnip pissusaanik ilisimasallit qassit pisariaqartinneqarnersut ilisimaneqanngitsoq

Isumaginninnermut, Inatsisinillu Atuutsitsinermut Naalakkersuisoq Martha Abelsen (S) sapaatip akunnera kingulleq Danmarkimiippoq danskit isumaginninnermut inatsisinillu atuutsitsinermut ministeriat ataatsimeeqatigiartorlugu. Inatsisartuni amerlanerussuteqartut ilungersortumik tatisinerat ataatsimiinnermut tunngaviuvoq, amerlanerussuteqartut Naalakkersuisut pinngitsaalivaat Danmarkimut saaffiginneqqullugit isumaginninnerup tungaatigut ikiorneqarnissamik qinnuteqaqqullugit.

Suliaq naatsumik

- Tasiilaq pillugu aallakaatitassiaq piviusumik tunngavilik "Byen hvor børnene forsvinder" DRip aallakaatippaa.
- Tassani takutinneqarpoq Tasiilami meeqqat pingajorarterutaat kinguaassiuutitigut atornerlunneqartut meeqqallu affaat kommunimut suliassiissutigineqartut.
- Aallakaatitassiap piviusumik tunngavillip Tasiilami nunattalu sinnerani isumaginninnikkut ajornartorsiutit pillugit oqallinneq ingerlateqqilerpaa.  
- Pingasunngorneq 22. maaji Naalakkersuisunut illua’tungiliuttut tamarmiusut aamma Naalakkersuisunut tapersersuisut Demokraatit Naalakkersuisunut aalajangigassamik nassiussipput piumasaqaatigalugu: Naalakkersuisut Danmark saaffigissagaat isumaginninnermut tunngasutigut ikiuunnissaat qinnutigissagalugu.
- Ataasinngorneq 27. maaji piumasaqaammut Naalakkersuisut tunniutiinnarput.
- Marlunngorneq 2. juuli Naalakkersuisup Martha Abelsenip (S) danskit nunamut namminermut aamma isumaginninnermut naalakkersuisuat ataatsimeeqatigaa, Danmakimit ikiuineq qanoq isikkoqassanersoq pillugu. 

Kissaatigisaq: Sulisut ilinniarsimasut ikiuutissapput

Ataatsimiinnermi oqaluuserineqarpoq nunatsinni isumaginninnikkut ajornartorsiutit annertoqisut suliarinissaannut danskit ikiuinissaat qinnutigineqassasoq.

Ajornartorsiutit ammaarlutik erseqqissisut Tasiilaq pillugu aallakaatitassiaq piviusunik tunngavilik ”Byen hvor børnene forsvinder” DRip aallakaatimmagu. Tassani saqqummerspoq illoqarfimmi meeqqat pingajorarterutaat kinguaassiuutitigut atornerlunneqartut meeqqallu affaat kommunimut suliassiissutigineqartut.

Ataatsimiinnermi Martha Abelsenip danskit ministeriinut kissatigisani allattuganngorlugit nassarpai: Siullerpaatut allassimavoq sulisut ilinniarsimasut sulianik ingerlatsinermik kommuninut ikiuisinnaasut aamma kommunini inunnik sullissisunik sanileralugit ilitsersuisinnaasut. Sulisut ilinniarsimasut sulianik passussinermut ilanngullutik ikiuussinnaasut kissaatigisat siullerpaat tulleraat. 

-Kommunit suleqatigilluinnarnissaat pingaaruteqarpoq taamatut qarsutiinnarnagit aggiinnarnatik  suleqatigalugit pinissaat pingaarutilerujussuuvoq, Niisip-imi siulittaasoq Ida Abelsen-Hansen oqarpoq.

Taamaakkaluartorli ilisimaqqissarneqanngilaq massakkut nunatsinni isumaginninnermut siunnersortit tarnillu pissusaannik ilisimasallit qassiunersut – amma qassit pisariaqartinneqarnersut ilisimaqqissaarneqanngilaq.

Tarnip pissusaanik ilisimasalik aamma Meeqqat Ikiortigit siulittaasuat Jonna Ketwa isumaqarpoq tarnip pissusaanik ilisimasallit ikinnerpaamik 150-t atorfissaqartinneqartut – ullumikkut Dansk Psykologforeningimi ilaasortat 50-t missaanniipput. Taakku sisamararterutaat pingasut imaluunniit affaat sinnilaarlugit sulianik passussillutik sulisuusut nalilerpaa.  

Kommunit nalunngilaat

Niisip-imi Ida Abelsen-Hansenip nalilerpaa peqatigiiffimmi ilaasortat 30-t missaaniittut, kisianni taakkunannga qassit isumaginninnermut siunnersortitut sulinersut naluaa. Kommunit tamanna nalunngilaat, naliliivoq.  

AAMMA ATUARUK Tarnip pissusaanik ilisimasallit amerlasuut amigaataapput

Nunatsinni isumaginninnermut siunnersortit qassit atorfissaqatippavut? 

- Kommunit namminneq tamanna akissavaat. Tamanna akisussaaffigaat, Ida Abelsen-Hansen akivoq. 

Naalakkersuisup Martha Abelsenip nassuerutigaa Namminersorlutik Oqartussat kommunillu isumaginninneq pillugu akisussaffitsik 1980-imi tigusartik kivissinnaasimanngikkaat. Erseqqissarpaa nunatsinni ullumikkut isumaginninnerup iluani atorneqarsinnaasut tamarluinnarmik atorneqartut, kisianni kommunini sulisut akisussaaffimmik piginnaanermillu kivitsinissannut naammanngitsut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat