Isumaginninnermut siunnersortit allanik suliaqalersartut

Sumiginnaasarneq aamma meeqqat inuusuttullu pillugit sullissinerup iluani suliassat ilungersunartut politikkikkut maannakkorpiaq oqallisaalluaraluartut taama inissisimasoqarpoq.

Isumaginninnermulli siunnersortit sulisoriinnarnissaat Namminersorlutik Oqartussat aamma kommunit namminneq akisussaaffigaat, Ilisimatusarfimmi isumaginninnermut tunngasunut immikkoortortaqarfimmi adjunkti Steven Arnfjord taama oqarpoq. Pisortani sulisitsisut akissaatitigut pitsaanerusumik neqerooruteqartariaqartut, taanna isumaqarpoq:

- Pitsaasumik akissarsiaqartinneqartariaqarput, suliassaqarfimmi sulinissaq pilerinartunngortinneqarluni aamma isumaginninnermik suliaqarneq ataqqisaalersillugulu nersugaalersinneqartariaqarpoq, Steven Arnfjord isumaginninnermut siunnersortinngornianik ilinniartitsisoq inuiaqatigiinnilu atugarissaarnermik ilisimatusartoq taama oqarpoq.

Atorfineqqaarnermi 20.000 koruuninik akissarsiaqartut

Taanna oqaluttuarpoq isumaginninnermut siunnersortip akissarsiai agguaqatigiissillugit qaammammut 20.000-it 26.000 koruunillu akornanniittartut, qanoq sivisutigisumik atorfeqarsimaneq apeqqutaatillugu.  

Peqqissaasulli isumaginnermut siunnersortinut naleqqiullugit akissarsiaat qaffasinnerupput atorfimminnilu qaffassarnissaminnut periarfissaat aamma pitsaanerullutik. Tamanna atuartitsisunut perorsaasunullu aamma atuuppoq:

- Taakku pikkorissaraangata, diplomitaarniarlutik ilinniaraangata imaluunniit masterinngorniarlutik ilinniaraangata qanoq pisoqartarpa? Taava akissarsiaat qaffattarput. Taakkununngami atorfimminni qaffakkiartortarneq nalinginnaasuuvoq. Isumaginninnermilu suliaqarnerup iluani tamakku pillugit isumaqatigiissutit naammassineqarsimanngillat.

Ilaqutariinnermut naalakkersuisoqarfiup isumaginninnermut siunnersortitut ilinniarsimasut 240-sut tamakkerlutik isumaginninnerup iluani ullumikkut suliaqarnerannik nassaassaqannginneranut tamannarpiaq nassuiaataasinnaasoq, Steven Arnfjordip oqaatigaa.

Marlugaangata aappaa allamik suliaqalersarpoq

Isumaginninnermummi siunnersortitut ilinniarsimasunit 240-sunit 120-t ullumikkut allanik suliaqartuupput:

- Imaqarniliuinermik, journalimut allattuinermik, allagaataasivilerinermik allanillu suliaqarsinnaapput. Taamaammat namminersortut suliffeqarfiutaanni pisortallu suliffeqarfiutaasa ilaanni atorluarneqarsinnaapput, Steven Arnfjord oqarpoq.

Taamaammat Nunatsinni sumiginnaasarnerit allatigullu isumaginninnermi suliassatigut annertuumik ajornartorsiutaasut iluarsiniarneqassappata, isumaginninnermut siunnersortitut ilinniarsimasut nersugaanerulernissaat nukingernartuuvoq:

- Nunatsinni meeqqanik, inuusuttunik ilaqutarinnillu sullissineq ilungersorfiuvoq. Suliassat oqimaatsupilussuupput, taakkulu eqqortumik ilinniarsimasunit isumagineqanngillat, Ilisumatusarfimmi adjunkti Steven Arnfjord taama oqarpoq.