Isumaginninnermut pisortaq: Suliffissaaleqisut pingaarnerupput

Ilaqutariit Uummannarmiut pingasunik meerallit, tassalu ataatsimik, arfineq-marlunnik aqqanilinnillu ukiulinnik, aningaasakilliornerminni nerisassaqarumallutik qanoq ilungersornersut tallimanngormat oqaluttuaraarput. Ilaqutariit kommunimi inunnik isumaginnittoqarfimmut ikioqqullutik saaffiginnikkamik, uiusoq aningaasatigut isertitaqarmat ikiorneqarsinnaanngillat. Inunnik isumaginnittoqarfimmit 900 koruunit tungaanut nerisassarsiniutissaminnik ataasiarlutik tunineqarput. Aningaasalli aningaasaateqanngikkallarnermi ikiuutitut naatsorsuutigineqarlutik kommunip karsianut taarserneqartussaasut ukiup affaa qaangiummat ilisimatinneqarput.

Larsine Lundblad Frederiksenip tallimanngormat oqaasiinut tunngasunik Uummannami inunnik isumaginninnermi pisortaq nipangersimasussaatitaaneq tunngavigalugu oqaaseqarsinnaannginnerarpoq. Ajornartorsiulli pillugu ima oqarluni:

- Soorunami aningaaseriviki unammillersinnaanngilarput, inuppalaartumilli pissuseqarluta inatsisit malillugit inuit nammassinnaasaannik aningaasanik erniaqanngitsunik atukkiisarpugut. Assersuutigalugu ilaqutariit 2.000 koruuninik atukkersinnaasarpagut, isumaqatigiissuteqarfigalugillu qaammammut 200 koruuninik akilersuisinnaanerannik. Saaffiginnittut aamma qanoq periarfissaqarnerannik oqaluttuuttarpavut.

Kommunimit kommunimut nerisassarsiutissatut tunniunneqartartut amerlassusaat assigiinngittaqaat. Inuilli aningaasatigut ikiorserneqassagaangata suliffissaaleqisut pinngitsooratik salliutinneqartartut, Inunnik isumaginninnermut pisortaq Dariusz Sobczynski oqarpoq.

Uummannami suliffissaaleqisutut nalunaarsorneqarsimasut 80-iupput.