Isumaginninnermut naalakkersuisoqarfiup qimannera Marthap uggoraa
Naalakkersuisoqatigiit allanngoramik Kommuninut naalakkersuisoqarfik pilersinneqarpoq. Qaasuitsullu Kommuniata avinneqarnissaa naalakkersuisoqarfiup pingaarnertut suliassarissavaa. Suliallu aallartinnissaanut Martha Lund Olsen qilanaarpoq, isumaginninnermulli akisussaaffiup Inuit Ataqatigiit naalakkersuisoriligaannut Sara Olsvigimut tunniunnissaa uggoraa.
- Soorunami pissangagalugu tiguara, aamma kommunit agguaqqinnissaanut taanna inatsisartuni eqqartorneqartoq, suliarinissaa naammassinissaalu qilanaarivara, Kommuninut Naalakkersuisoq, Martha Lund Olsen taama oqarpoq.
Aamma atuaruk Innuttaasut kissaatigisaat Inatsisartut isumaqatigiissut ilalerpaat
Qaasuitsup Kommuniata avinneqarnissaa Inatsisartuni amerlanerussuteqartut tapersersorpaat, qanorli avinneqassanersoq kiallu akilissaneraa suli eqqartorneqarpoq, isummallu assigiinngillat. Qaasuitsup Kommuniata avinnissaa kommunip nammineq akilertariaqaraa, Naalakkersuisoqatigiit kingulliit taama oqarput.
Qaasuitsup Kommuniata avinneqarnissaanut suliap Namminersorlutik Oqartussanit aallartinneqarnera, Qaasuitsup Kommuniani borgmesterip Ole Dorphip, qujamasuutigaa.
- Tungitsinningaanniit pissangatigaarput, aamma naalakkersuisoqarfiup taassuma sorpiaat imassarineraa suli ullu manna tikillugu, annerusumik paasisassaqarfiginngilagut. Aammami naalakkersuisoqarfik nutaajoqigami, taamaattumik pissangalluta utaqqivugut, kisianni neriuuteqarluarpugut, Qaasuitsup Kommuniani borgmesteri, Ole Dorph, taama oqarpoq.
Aamma atuaruk Tunup immikkut kommuninngornisaa Naalakkersuisut itigartitsissutigaat
Najukkami siunnersuisoqatigiinnik kommunit pilersitsinissaat, naalakkersuisoqatigiinngortut kajumissaarutigaat, nunaqarfinnilu aqutsisut aalajangiisinnaassusaasa annertusarneqarnissaat, kiisalu aningaasatigut oqartussaaffeqarnerat inatsisitigut qulakkeerneqarnissaa, naalakkersuisoqatigiit isumaqatigiissutaanni ilanngunneqarsimavoq.
Saniatigulli Tunup immikkut kommuninngornisaa peerneqarsimavoq. Tunulli namminerisaminik kommuninngornissaanik innuttaasut kissaataat, Naalakkersuisut siulittaasuata siusinnerusukkut itigartitsissutiginikuuaa.
