Isumaginninnermut ministerip oqarnera naapertorlugu danskit naalakkersuisuisa Danmarkimi meeqqat qanorluunniit tunuliaqutaqaraluarpata sumiginnarneqarnissamut atugarliornissamullu illersorneqarnissaat pingaarnerpaatittarpaat.Assi: Emil Helms/Ritzau Scanpix

Isumaginninnermut ministeri angerlarsimaffiup avataanut inissiisarnernut qisuariartoq: Kommunit oqalutseqarnissaq pisussaaffigaat

Isumaginninnermut ministeri, Astrid Kragh VIVE-p Danmarkimi kalaallit meeqqat angerlarsimaffiup avataanut inissinneqartut pillugit nalunaarusiaata kingornatigut Danmarkimi kommuninut tallimanut allakkamik nassiussivoq. Peqatigiiffiup, Kalaallit Meerartaasa danskit kommuniisa suliaqarnermi akisussaaffitsik misissussagaat neriuutigaa.

Isumaginninnermut ministeri, Astrid Krag Danmarkimi kalaallit meeqqat angerlarsimaffiup avataanut inissinneqarsimasut pillugit sulianut maanna qisuariaateqarpoq.

VIVE-miimmi nalunaarusiap "Børn med grønlandsk baggrund, der er anbragt i Danmark - fra danske kommuner" qaammatip siuliani saqqummiunneqartup angerlarsimaffiup avataanut inissiinermi suliani sulianik isumaginnittut kalaallillu angajoqqaat akornanni paatsuungasoqartarlunilu oqaatsitigut ajornartorsiuteqartoqarnera saqqummiummagu tamanna ukkatarineqalerpoq.

Danmarkimi kalaallit meeqqat 100-gaangata tallimat angerlarsimaffiup avataanut inissinneqarsimasarput. Taakku danskit meerartaannut sanilliullugu tallimariaammik amerlanerupput.

Danskit isumaginninnermut ministeriata, Astrid Kragip danskit kommuniinut allagaqarnermini angerlarsimaffiup avataanut inissiinermi suliani malittarisassat matumani oqaatsinut kulturimullu tunngasut erseqqissaatigai.

Isumaginninnermut ministerip oqarnera naapertorlugu danskit naalakkersuisuisa Danmarkimi meeqqat qanorluunniit tunuliaqutaqaraluarpata sumiginnarneqarnissamut atugarliornissamullu illersorneqarnissaat pingaarnerpaatittarpaat.

- Taamaammat kalaallit meeqqat angajoqqaavilu angerlarsimaffiup avataanut inissiinermut suliamut atatillugu attaveqaqatigiinnermi paaseqatigiinnissaat tunngaviulluinnarpoq. Kommunit allallu oqartussaasut oqalutseqartitsinissamut nutserisinnaatitsinissamullu pisussaaffeqarput, meeqqanullu angerlarsimaffiup avataanut inissinneqartunut angajoqqaajusut suliap ingerlanerani illersuiseqarnissamut pisinnaatitaaffeqartuaannarlutik, Astrid Krag KNR-imut allappoq.

Peqatigiiffiup, Kalaallit Meerartaasa allagaq kommunit suliatigut akisussaaffimminnik misissuinissaannut eqqaasitsissutaanissaa neriuutigigaat, generalsekretæri, Puk Draiby allappoq:

- Angerlarsimaffiup avataanut inissiinermut suliani paatsuuisoqarfiusartumi oqalutseqartoqartannginnera malittarisassallu malinneqartannginnerat ajornartorsiutaalluinnarpoq. Iliuuserineqartut inissiinertulli sakkortutigitillugit suliamik isumaginninnerup pitsaasuullunilu erseqqissuunissaa pingaaruteqarluinnarpoq.

Suliamik isumaginnittut akisussaaffigigaat

Isumaginninnermut ministerip, Astrid Kraghip kommunit malittarisassat erseqqissarsimasut malillugit iliuuseqarnissaat neriuutigilluinnarlugu allappaa.

Kalaallit Meerartaanni generalsekretærip, Puk Draibyp isumagininnermik suliaqartut angerlarsimaffiup avataanut inissiinermi sulianut atatillugu pingaaruteqartumik akisussaaffeqartut erseqqissaatigaa.

- Suliamik isumaginnittut suliaqarnerminni oqalutseqarnikkut aammali sulianut alapernaannikkut kulturikkullu assigiinngissutsimik maluginiaanikkut paaseqatigiittoqarnerata qulakkeernissaa suliassaraat, Puk Draiby oqarpoq.

VIVE-p nalunaarusiaani angerlarsimaffiup avataanut inissiinermi meeqqanut pissutsit isiginiarneqaratik angajoqqaanut pissutsit isiginiarneqarnerusartut inerniliuppaa. Tamanna kalaallit angajoqqaat Danmarkimi kiserliornermik nalaataqarnerannik kulturikkullu assigiinngissutsit pissutigalugit ilaqutariinni toqqissisimajunnaarsitsisinnaasunik ilaatigut pissuteqarpoq.

Aamma Peqatigiiffik Kalaallit Meerartaasa Københavnimi allaffianni nunarput ungasissorujussuartut ippoq. Peqatigiiffiullu kalaallit ilaqutariit pitsaanerusumik ilanngunneqarnissaat sulissutigisarpaat.

- Ilaqutariit Danmarkimut tikerlaat tapersersorneqarnissaat ukkatarineqassaaq, taamaalillutik maani inuunerissaarsinnaassallutik. Ilaqutariit atugarliortut eqqartoraangatsigit angajoqqaat attorsaateqartuugajupput, taakkulu Danmarkimi pitsaasumik ilaqutariilersinnaaniassammata artorsaatiminnik suliarinninnissaannut periarfissaqarnissaat pingaaruteqarpoq, Puk Draiby oqarpoq.

Tamatuma saniatigut angerlarsimaffiup avataanut inissiinerit ilaat pisariaqartuusut erseqqissaatigaa.

- Angerlarsimaffiup avataanut inissiinissaq meeqqamut pitsaanerpaagaangat meeqqat allatut oqaaseqarlutillu kultureqarnerat pingaartisallugu aamma meeqqap suminngaanneernerminik attassiinnarnissaa pingaaruteqarpoq, Puk Draiby oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl