Isumaginninnermut aningaasaateqarfiup SIKp ilaasortai iluaqusissavai
Isumaqatigiissut illuatungeriinnit iluarineqarpoq.
- Isumaqarpugut angusarput ajoriinnagassaanngitsoq, SIK-p siulittaasua, Jess G. Berthelsen oqarpoq.
Akissarsiat ukiuni marlunni atuuttussat 4,05 procentimik qaffanneqarput. Isumaginninnikkut aningaasaateqarfik nutaaq pilersinneqarpoq. Taakkuli isumaqatigiissutigineqarneranni juullertinnagu akissarsisarneq taamaativinneqarpoq.
Naak annertunerusumik angusaqartoqarsinnaaneranik kissateqaraluarluni, SIK-ip siulittaasuata, Jess G. Berthelsenip angusartik nuannaarutigaa oqarluni isumaqatigiissummi toqqammaviusut pitsaasuusimanngikkaluarpata atsiorsimanavianngikkaluarami.
Jess G. Berthelsenip nuannaarutiginerpaasaa tassaavoq, SIK-imi ilaasortat ilaquttaminnik nappaateqartoqalersillugu aningaasaateqarfimmit nutaamik pilersinneqartumit tapiiffigineqarlutik angalasinnaanngormata.
- Assersuutigalugu sulisartumut aappaasoq kræftimik nappaateqalerluni Nuummukaanneqassappat imaluunniit Danmarkiliaanneqassappat, taava periarfissaqalerpoq aappaasoq isumaginninnikkut aningaasaateqarfimmit akiliunneqarluni angalaqataanissaminut, Jess G. Berthelsen oqarpoq.
Akissarsiat pillugit isumaqatigiissut nutaaq ukiuni marlunni atuuttussaq qaffanneqartoq 4,05 procentimik annertugisassaanngikkaluartoq taamaattoq SIK-p siulittaasua naammagisimaarinnippoq, taamaattorli ima oqarluni.
- Angusarput una ajorisimagukku atsiorsimassanngikkaluarpara, kisianni soorunami kissaatigisimagaluarparput annertunerusumik tunineqarnissarput, pissutigalugu ukiuni kingullerni akissarsiat pisissutigineqarsinnaasut 8,4 procentip missaanik appariarsimammata. Kisiannili tassa angusinnaasagut taakkuupput Naalakkersuisunillu tunniunneqarusuttut. Taamaattoq kattuffinnut allanut naleqqiullugu angusarput ajoriinnagassaanngilaq, SIK-p siulittaasua, Jess G. Berthelsen oqarpoq.
Pisortat isumaqatigiissut aamma iluarisimaarpaat.
- Angusarput nuannaarutigaara, neriuutigiinnassavaralu SIK-p ilaasortaannit isumaqatigiissut akuerineqarluni taassissutigineqarumaartoq. Nuannaarutiginerpaavarali SIK-mi ilaasortat ilaquttaminnik napparsimasoqalersillugu isumaginninnikkut aningaasaateqarfimmit tapiiffigitissinnaanngornerat, Aningaasaqarnermut Naalakkersuisoq Maliina Abelsen taama oqarpoq.