Isumaginninnermi suliniutit sallitinneqarnerunissaat kissaatigineqarpoq

Kommunit isumaginninnikkut sullissinerminni periarfissaaruttutut misigisimasut maannangaarlu iliuuseqartoqartariaqartoq, isumaginnittoqarfinni pisortat Maniitsumi ataatsimiinnerminni naliliipput.

- Pinaveersaartitsineq, meeqqat inuusuttuaqqallu sumiginnagaasarnerat kinguaassiutitigullu atornerlunneqartarnerat pingaarnerutillugit oqaluuseraavut, inerniliivugullu meeqqat ajornartorsiortutut maanna tusartualikkavut ikiorniarlugit annertuumik iliuuseqartoqartariaqalersoq.

Isumaginnittoqarfinni pisortat peqatigiiffianni siulittaasoq Magga Fencker oqarpoq.

Inuiaqatigiinni ajornartorsiutit assigiinngitsut, soorlu assersuutigalugu meeqqanik sumiginnaasarnerit kinguaassiutitigullu atornerluisarnerit qaangerniarnerini pinaveersimatitsiniarnermilu kommunit kisimiippallaarlutik suliniuteqartarnerat allanngortittariaqalersoq, isumaginnittoqarfinni pisortat peqatigiiffiat isumaqarpoq.

Taamaattumik Namminersornerullutik Oqartussat suleqataanerulernissaat aningaasaliissuteqarnerulernissaallu piffissanngortoq isumaqarput. Aammali suliniutinut piareersimasunut akuersissutissat sivisuallaamik utaqqineqartarnerat uparuarneqarpoq, qinikkalli suliassanik tulleriiaarinerat sakkortuumik aamma isornartorsiorneqarluni.

- Aningaasat pisariaqartitatsinnut atorneqanngillat. Akerlianilli sanaartugassanut annertuunut, soorlu mittarfeqarfinnut talittarfissuarnullu atorneqarnissaannik pilersaarusiortoqarluni. Taamaattumik ajornartorsiutit qaangerneqassappata suliassanik tulleriiaaraluni pingaarnersiuisoqartariaqalerpoq ataqatigiissaartumilli sulisoqartariaqalerluni. Magga Fencker taama oqarpoq.