Isumaginninnermi Siunnersortit suliassaqaqaat

Nunatsinni Inunnik isumaginninnermi Siunnersortitut Ilinniarsimasut Peqatigiiffittaavat, NIISIP, aallarterlaajusoq suliassaqaqaaq. Atorfinnit qimarrattut, ulluinnarni atukkat akissaatillu pitsaanngitsut ilorraap tungaanut saatinniarneqarput. Siulittaasunngorlaaq, Vittus Poulsen, iluarsisariallit pillugit ima oqarpoq.

-Soqutiginartut ilagivaat ulluinnarni sulineq oqinnerulissappat qanoq-una sulisariaqartugut. Eqqartuinitsinni siulersuisuni ataatsimiikkatta isumaqatigiissuterput unaavoq: Ullumikkut suleriaaseq pisoqalivallaaqaaq, allanngorsartariaqarpoq. Nukiit pitsaanerusumik atortariaqarpagut. Nungullarsarpallaarluni ajormat, immaqa oqinnerusumik sulisinnaaruttorluta. Tamakku ujartugassatta ilagissavaat.

Vittus Poulsen aamma oqarpoq, peqatigiiffittaamik Atorfillit Kattuffiata ataani inissisimanissaa kissaatigigitsik, tamannalu pillugu aqagu ataatsimeeqatigissagitik. Peqatigiiffittaap akissarsianik isumaqatigiinniarsinnaanera eqqartugassat ilagaat.

NIISIP-imi siulersuisunut ilaapput, siulittaasup tullua Sara Abelsen, Aningaaserisoq Leoma Andreassen, Allatsi Astrid Hansen Hard, siulersuisunut ilaasortaq Britta Nielsen Johansen sinniisuussaappullu Karen D. Hansen aamma Ida Abelsen.