Isumaginninnermi siunnersortit peqatigiiffittaarniarput
Nunatsinni inunnik isumaginninnermi siunnersortitut ilinniarsimasut sulinerminni atugarisatik pitsanngorsarniarlugit peqatigiiffissaminnik maanna pilersitsinialerput.
Inunnik isumaginninnermi siunnersortitut ilinnigaqarsimasut 12-it, Nuummi suliffeqarfinni assigiinngitsuni atorfeqartut ippassaq ataatsimiipput, peqataaffimmik pilersitsinissaq siunertaralugu. Ataatsimiinneq siunnersortitut ilinniarsimasut akissarsiatigut tunuliaqutaannit Atorfillit Kattuffiannit peqataaffigineqarpoq.
Ataatsimiinnermi isumaqatigiissutigineqarpoq inunnik isumaginninnermi siunnersortitut iliniarsimasut peqatigiiffissaat pilersinniarlugu maajimi ataatsimeersuartoqassasoq.
- Ukiuni makkunani inunnik isumaginninnermi siunnersortit sulinerminni atugaat suliamut naleqqiullugu akissaatit naleqqukkunnaavissimasut pitsanngorsartariaqarput. Aammalu ilisimavarput taamatut ilinniarsimasut periarfissaq siulleq atorlugu suliffinnut akissarsiarissaarfiunerusunut nuuttartut, tassami sulinermi atukkat pitsaannginneri pissutaaqqataalluinnarput, Vittus Poulsen allappoq.
Isumaginninnermi siunnersortitut ataatsimeeqatigiissimasut aamma allapput, kommunini arlalippassuarni isumaginninnermi siunnersortitut atorfiit, akissaatilunneq pissutigalugu suliffigiumaneerussimasut, tamatumalu kinguneranik suliffigalugit ilungersunarsiartorsimasut.
- Peqatigiiffeqalernitsigut piumasaqaatigut ersarinnerusut saqqummersittalerumaarpagut, aammalu akissaatit pitsanngorsaaqataaffigilernissaat periarfissaqarfigilissavarput, Vittus Poulsen allappoq.
