Kommunini ataasiakkaani inunnik isumaginnittoqarfiit inuttakilliorneq pissutigalugu sullissinerminni artukkersorneqartarput, suliaallu pipallataavallaartarlutik, soorlu Nuummi inunnik isumaginninnermi immikkoortortap aqutsisua Karen D. Jensen taama oqartoq:
- Miserratigisinnaanngilara taamatut iliortariaqartarpugut tuaviinnaq, tuaviinnaq ingerlaaratta. Nuanninngikkaluarpoq taamatut oqassalluni, kisianni taamatut misinnartarpoq, Karen D. Jensen oqarpoq, nangipporlu:
- Sulisut qiviarneqartariaqarput, sulisut amerlineqartariaqarput, isumaginninnermilli siunnersortit atugassarititaat pitsanngorsarneqartariaqarput.
Isumaginninnermillu suliallit akissarsiaasa qaffaavigineqarnissaat ujartorpaa, akissarsiaasa suliaqassusaannut naleqqutinngilluinnarnerarlugit.
Sinerissami illoqarfinni arlalinni inunnik isumaginnittussaaleqisoqarportaaq. Qasigiannguit Kommuneanni ukiuni tallimani inunnik isumaginnittussanik siunnersorteqarsimanngilaq.
Sisimiut Kommuneanni inunnik isumaginnittoqarfik sulisussaaleqinermik aamma eqqugaasimavoq.
Qaqortup Kommueani inunnik isumaginnittoqarfimmi sulisut maanna sisamaapput, arfiniliusussaagaluarlutik. Taamaakkaluartoq pisortaat Helga Rask Jensen oqarpoq kommuninut allanut sanilliullugu pitsaasuusoq.
Isumaginninnermi Siunnersortinngorniat Ilinniarfianni pisortaq Martha Olsen oqarpoq siunnersortit suliassaqarpallaalerlutik stress-ilertartut:
- Inuttakilliornerup kingunerisaanik sulisut stressilersarput, siunnersuinerillu naammaginanngitsumik pipallataavallaamillu naammassineqartarlutik, Martha Olsen oqarpoq.
