Isumaginninnermi peqqissutsimilu pitsaaliunermi suliniutit ataatsimoortinneqalersut
Peqqissutsimut, isumaginninnermut inatsinillu atuutsitsinermut naalakkersuisoq, Martha Abelsen (S), taama ilisimatitsivoq.
Pikkoriffiit ataatsimoortinneqarpata, pitsaaliuiniartut suliaat pitsaanerulissasoq, minnerusumillu allaffissortoqartalissasoq, naalakkersuisoq oqarpoq.
- Massakkut kattunnerisigut, pikkoriffiit assigiinngitsut katiterlugit, qaninnerusumillu avammut suleqatitsinnut ersarinnerulersinnissaat siunertaralugu ukua naalakkersuisoqarfiit marluk pitsaaliuinermut suliaat kattunneqarput, Martha Abelsen oqarpoq.
Immikkoortortaqarfik nutaaq katiteriffiusoq PAARISA-mik taaguuteqassaaq Isumaginninnermut Aqutsisoqarfimmullu ilaassalluni.
AAMMA ATUARUK Forebyggelse af kriminalitet skal starte i Tasiilaq
Isumaginninnermut Aqutsisoqarfiullu taaguutaa allanngortinneqarpoq Pitsaaliuinermut Isumaginninnermullu Aqutsisoqarfimmik taaguuteqalerluni.
Aqutsisoqarfiup sunniutissai ungasinngitsukkut malugineqarsinnaalissasut, Martha Abelsen isumaqarpoq.
Taassuma ilanngullugu ilisimatitsissutigaa, PAARISA nutaaq marsip aallaqqaataanni pilersinneqarmat, pitsaaliuinermik ataatsimoorussamik sulineq aallartereersoq.
Taamalu sulineq arlalinnik iluaqutissaqartoq, Martha Abelsen isumaqarpoq.
- Suleqatigiinnerup qaninnertut, oqinnertut ersarinnerusutullu ingerlanneqarnissaa takorloorneqarsinnaavoq, Martha Abelsen oqarpoq.
Suliniutit peqqiissutsimut naalakkersuisoqarfimmi, Peqqinnissamut Pitsaaliuinermullu Aqutsisoqarfimmi, Isumaginninnermut Aqutsisoqarfimmi aammalu Allorfimmi siornatigut inissisimasimasut ataatsimut katersorneqarput.