Isumaginninnermi Naammagittaalliuuteqartarfiup oqaasii KANUKOKA-mit ilumoornerarneqarput
Isumaginninnermi Naammagittaalliuuteqartarfimmi sulisut ilaatigut naammattumik ilinniagaqarsimannginnerat pissutaalluni suliassat amerligaluttuinnartut ullaaq radioaviisimi tusarliupparput. Naammagittaalliuteqartarfimmi siulittaasup Naja Joelsenip taamatut oqarnera KANUKOKA-p pisortaata Martha Labansenip ilumoortortaqarnerarpaa.
Allattoq Mads Lynge
juunip 16-at 2009 15:09
Martha Labansen ima oqarpoq:
- Suliassanut tunngatillugu malittarisassat saniatigut qanorpiaq suleriartoqarnissaanik siunnersuinissaq naalakkersuisoqarfimmiit pisussaaffiummat erseqqissaatigissavara, nassuiaatilli ilaat pisortaqarfimmiit nassiunneqartut ilaat kukkuneqarsimapput, taamaammat kommunip sulisuisa erseqqinnerusumik nassuiaanneqartarnissaat tungitsinninngaanniit qinnutiginikuuarput, Martha Labansen radioaviisimut oqarpoq.
Taanna isumaqarpoq pikkorissaasarnerit annertunerusumik ingerlanneqartariaqartut, ulluinnarni sulinermi ilitsersuutit pikkorissarnerup saniatigut pigineqarnissaat pingaaruteqarnerarlugit.
