Isumaginninneq pillugu isumaqatigiissut nukittorsarneqassaaq

Ilaqutariinnermut peqqinnissamullu naalakkersuisoq Arkalo Abelsen Danmarkimi atugarissaarnermut ministerimik Karen Jespersenimik ataatsimeeqateqaqqammerpoq.
februaarip 14-at 2008 08:25

Ataatsimeeqatigiinnermi isumaqatigiissutigineqarpoq, Danmarkip nunattalu 2006-imi isumaginninneq pillugu isumaqatigiissutaat siunissami nukittorsarneqassasoq. Taama ilisimatitsivoq Søren Gregersen, atugarissaarneq pillugu ministeeriaqarfimmi tusagassiisartuusoq.

Tamatumani sorpiaat pineqarnersut Isumaginninneq pillugu Attaveqaqatigiittartuni 2006-imi suleqatigiinnissaq pillugu isumaqatigiissuteqarnermi ilanngullugu pilersinneqartumi oqaloqatigiissutigineqassapput.

2006-imi isumaqatigiissummi piginnaasanik ineriartortitsinermi misilittakkanik, atuartitsinermi atortussanik pikkorissarnernilu misilittakkanik paarlaateqatigiinnissaq pineqarpoq.