Atassut: Isumaa mumilluinnartoq

Tassami Atassut Inatsisartunut ilaasortaatitaqalissaguni Naalakkersuisoqatigiinnut peqataassanngitsoq siulittaasoq pingasunngornermi KNR-imut oqarpoq.

- Soorunami qinersinissap inernissaa utaqqeqqaartariaqarparput kisianni naalakkersuisoqatigiittarsimavugut aamma pilliuteqarpallaartarsimasutut misigisimavunga 1995-imiilli suleqataasarninni, Siverth K. Heilmann KNR-imut pingasunngormat oqarpoq.

Partiilli isumaa mumilluinnarpoq.

- Suleqateqarluarnissamik angusaqarluarnissamillu Atassut pingaartitsisuuvoq, misilittagaqarluarnerpullu sunniuteqarsinnaaneq annertunerpaaq qinersisartunut neriorsuutigissavarput, Siverth K. Heilmann maanna allappoq.  
Illuanorluinnaq saanneq partiimi siulittaasunngorniunnermi siorna pisumi unammillertigisaata, Qulutannguaq Berthelsenip, qinigassanngortinniarnini ippassaq sisamanngornermi unnukkut kingusissukkut nalunaarutigereeraalu. 

- Partiinut tamanut suleqateqarsinnaanera angorusuppara. Atassutip anguniagaai partiitut kisimiilluta angusinnaangilagut. Pingaartuuvoq angusaqassagaanni partii allat suleqatigisinnaanissaat, Qulutannguaq Berthelsen allappoq.