Isukasiani piaanissamut qinnuteqaat nassiunneqarpoq
Ilaatigut oqaatsitsigut piumasaqaatit pissutigalugit kinguaattoortoqareersorlu, aatsitassarsiortitseqatigiiffiup Nuup Kangerluata qinnguani saviminissamik piiaaffiliornissamut qinnuteqaataa 6.000-nik ikinnerunngitsunik quppernilik tunniuppaat.
Kingusinaarlunili qinnuteqaammik tunniussisariaqarsimaneq London Mining-ip pilersaarusiaata kinguaattoorneranik kinguneqarpoq:
- Piffissaliussarput siulleq naapertorlugu septembarimi aallartisartussaangaluarpugut, maannali tamanna pisinnaajunnaarpoq. Tassa 2013-ip qaammataasa siulliit pingasut ingerlanerini aatsaat aallartisarsinnaanngussaagut.
London Mining-imi tusagassiinermut pisortaq Kaj Kleist taama oqarpoq.
Taamatulli pisoqannginnerani Naalakkersuisut akuerseqqaattariaqarput. Tassa London Mining-ip saviminissamik piaalernissamut qinnuteqaataa aasap ingerlanerani qaammatit pingasut atorlugit tusarniaassutigineqaqqaassaaq, iluarsisassaqassappallu iluarseqqaariarlugit Aatsitassanut ikummatissanullu pisortaqarfimmut qinnuteqaat tunniunneqassaaq, tamatumalu kingorna politikkikkut nalilersuiffigineqarnissaa aatsaat tullinnguutissalluni.
London Mining-ili isumalluarpoq, piiaanissamullu akuersissutip pissarsiarinissaa ilimagalutikku:
- Politikerit tungaaniit suliaq pillugu oqaaseqaataasa isumallualersippaasigut, akuerineqarnissarpullu ilimagalutigu. Kaj Kleist oqarpoq.
Oqartussaasut akuersissagaluarpata saviminissamik piiaaffissaq 14 milliardtit koruuninik naleqartussaq pilersinneqarluni aallarnersarneqarsinnaanngussaaq, tassanilu Kinamiut sulisartut 2000-t tikisinneqarlutik sulisorineqarnissaat naatsorsuutigineqarpoq.
London Mining Kinamiunit pigineqartoq Kinamiullu aningaasaataanik tunuliaquteqartoq Isukasiani saviminissamik piaaffissamut misissuinernut qillerinernullu 300 millionit koruunit atoreersimalerpaat.
...
Maria Hornbek-ip ilanngutassiaa Knud Reimerip kalaallisut suliaraa.