Isugutannerulerneratigut kiannerulerneratigullu ippernaqalernerulissaaq
![](/sites/default/files/styles/image_934x467/public/article_images/ippernat_myg_kristine_sowl_usfws_flickr.jpg?itok=78v2Ay5n)
Silap pissusiata allanngoriartornera sorpassuarnut pissutaatinneqartarpoq. Ilisimatuullu USA-mi Dartmouth Collegemeersut maanna oqaatigaat ippernat ukiuni aggersuni amerlingaatsiarnerannik tamanna aamma kinguneqarumaartoq.
Ilisimatuut oqaluttuarput nunani issittuni kiannerulernera pissutigalugu ippernat sukkanerusumik alliartulissasut, tuttunullu akornutaalersinnaallutik ippernat ilaatigut tuttut aavinik milluaasuummata.
AAMMA ATUARUK VIDEO Aasap alianaaqutinngui takkutereerput
Ilisimatuut Kangerlussuup eqqaani ippernanik nakkutilliillutik misissuisimapput. Misissuinerminnilu paasivaat ippernat sapaatit-akunnerinik marlunnik siusinnerusukkut inerittartut taamaalillutillu masarsoqarfiit siusinnerusukkut qimattarlugit uumaniarnissaminnullu periarfissagissaarnerusarlutik.
Lauren Culler Darmouthimeersoq misissuinermi aqutsisuuvoq. Taanna allaaserisami sapaatit-akunnerani matumani saqqummersinneqartumi allappoq tuttut ippeqinissartik pinngitsoorumallugu qutsinnerusumi neriniarfigisassanut allanut nuuttartut.
Tamannalu tuttunut akornutaasinnaavoq, sumiiffinnimi neriniarfissaanni allani nerisinnaassaat allaanerullutillu ajornerusinnaammata.
![](/sites/default/files/styles/image_934x467/public/lauren_culler-myggeforsker.jpg?itok=KHBF2-cf)
Lauren Culler Dartmouthimeersoq Kangerlussuup eqqaani ippernanik misissuisoq. Asseq: Danny O'Donnell.