Issitumi sikup aakkiartornera Eqalunni oqallisigineqassaaq

Immap sikuata aattarnera annertusiartuinnavippoq, siornalu aatsaat taama aatsigaluni.

Issittumi immap sikua tamakkerluni aappat qanoq iliortoqassanersoq, sikulu aannikuunngitsoq qanoq iliuuseqarfigineqarsinnaanersoq  politikerit, atorfilittat,  Eqalunni innuttaasut aamma ilisimatuut suliniaqatigiiffiillu Eqalunni isumasioqatigiinnermi oqallisigissavaat.

Pinngortitaq pillugu nunarsuaq tamakkerlugu suliniaqatigiiffik, WWF,  Eqalunni isumasioqatigiinnissamut  suliniuteqartuuvoq. Tassani annerusumik sammineqassapput  Qaanaap avataani aamma nunatta avannaata imartat kisalu qeqertat Canada-p avannarpasinnerusortaaniittut oqallinnermi sammineqassapput. 

Sumiiffinni taakkunani pineqartuni aasakkut sikusassasoq sikut allanngorarnerinik takussutissat takutippaat issittullu sinnerani ilisimatuut naliliinerat malillugu ukioq 2040-imi aasakkut siku tamakkerluni aattassaaq.

Issittumi pissutsit pillugit oqallittoqarnissaa pillugu, WWF-ip pingaartippaa, taamaammallu isumasioqatigiisitsineq saqqummiussinerlu aaqqissorlugu.

Juunip ulluisa sisamaanni tallimaannilu isumasioqatigiittoqassaaq saqqummiussisoqarlunilu.

Inatsisartunut ilaasortat arlaqartut  Inuussutissarsiornermut aatsitassarsiornermullu naalakkersuisoqarfimmi atorfilittat peqataassapput, soorlu aamma Ineqarnermut, Pinngortitamut Avatangiisinullu Naalakkersuisoqarfimmi atorfilittat peqataassasut.

Inuit Issittormiut Siunnersuisoqatigiiffiat ICC  aamma peqataatitaqassaaq.

Iqalunni politikerit, Nunavummi naalakkersuisut sinnerlugit aallartitat  aamma ilisimatuut  McGill Universitet-meersut kiisalu  Laval Universitet-meersut taamatullu soqutigisaqaqatigiit aasigiinngitsut Eqalunni isumasioqatigiinermi peqataassapput.