Issittup Ukiui aallartipput
Nunat tamat issittumut ukiorititaat ullumikkut marsip ulluisa aallaqqaataanni aallartipput, tamannalu Københavnimi ammaanersiorluni malunnartinniarneqassaaq. Ammaanersiorneq maani nalunaaqutarput malillugu ullaarli arfinernut aallartittoq, internetikkut aallakaatinneqarpoq nunarsuarlu tamakkerlugu uani malinnaaffigineqarsinnaalluni www.arcticportal.org.
Nunatsinni Issittup Ukiuinut suliniummut pisortaasoq, Birger Poppel, oqarpoq, Issittup Ukiuisa aallartinnerat nunatsinni immikkut malunnartinniarneqassanngitsoq. Tamatumunnga taarsiullugu Islandip, Savalimmiut, Nunatta aamma Danmarkip Illu Atlantikumi Københavnimiittumi angisuumik aaqqissuussilluni ataatsimoorluni ammaanersiornissaq ingerlanniarpaat.
- Issittup Ukiuisa aallartinnerisa ataatsimoorluta malunnartinnissaat aalajangiupparput aaqqissuussinerlu internetikkut malinnaaffigineqarsinnaasunngorlugu. Nunarput soorunami Københavnimi peqataatitaqassaaq ilaatigut ilisimatusartunit, Issittup Ukiui pillugit ataatsimiititaliamit politikerinillu, Birger Poppel Radioavisimut oqarpoq.
Tamatuma saniatigut Birger Poppelip erseqqissarpaa nunatsinni Issittup Ukiui kingusinnerusukkut malunnartinniarneqarumaartut, ilaatigut sinerissami oqalugiaqattaartitsinikkut.
- Kalaallit, nunanilu allamiut ilisimatusartut, sinerissami oqalugiaqattaarnissaannut maanna aningaasaliiffigineqaqqammerpugut, taamaalilluta Issittup Ukiuini pisut pillugit oqalugiaqattaartitsisinnaanngorpugut, Birger Poppel oqarpoq.
Kunngissaq Frederik, Issittup Ukiuinut illersuisuusoq, ammaanersiornermi Illu Atlantikumi peqataassaaq. Ministerillu arlallit ammaanersiornermi peqataassapput, soorlu naalakkersuisunut ilaasortaq Tommy Marø aamma peqataassaaq.
