Issittup ukiuanut danskit aningaasaleerpianngitsut
Nunat tamalaat issittumi ukiorititaannut Danmark aningaasaliinikippallaarpoq danskillu issittumi ilisimatusarnerni kinguussaapput, kalaallit naalakkersuinermik suliaqartut ilisimatuullu nunani tamalaaneersut taama isornartorsiuipput.
Norgemi pissutsit allarluinnaapput. Svalbardimi ilisimatusarfik nutaaq Norgep iluaqutigalugu nunat tamalaat issittumi ukiorititaanni siuttuulissaaq.
Norgemiut qulanngillat: issittumi nukissiuutinik ulikkaarpoq nunarsuarlu tamakkerlugu siunissami taakku pingaaruteqartorujussussallutik. Taamaattumik norgemiut 2020-imi avannaarsuani ilisimatusarnikkut siuttuunissartik anguniarpaat. Tamanna Norgemi ilisimatuut siunnersuisooqatigiiffiata nalunaarusiaani nutaami atuarneqarsinnaavoq.
- Norgep 300 million koruunit uuliamik silannarmillu misissuinernut atugassat immikkoortereerpai. Issittumi ilisimatusarnernut amerlanernik aningaasaliinissaq pilersaarutaavoq, Norgemi ilisimatuut siunnersuisooqatigiiffiani immikkoortoqarfiup pisortaa Kirsten Broch Mathisen taama oqarpoq.
Svalbardimi illoqarfiit ilaanni Longyearimi Svalbard Universitetimut UNIS-imut tapertaasumik ilisimatusarfimmik norgemiut sanaartortitseqqammerput.
Norgemiut isumaqarput nunat tamalaat issittumi ukiorititaata Svalbardimilu universitetip issittumi ilisimatusarnissat aqqutissiuulluarsimagai.
Norgemi naalakkersuisut aappaagumut aningaasanut inatsisissatut siunnersuutertik oktobarip aallartilaarnerani pisortatigoortumik saqqummiutissavaat. Nunat tamalaat issittumi ukioritaannut norgemiut qanoq pilersaaruteqarnersut tassani saqqummersinneqassaaq.
