Issittup ukiuanut atatillugu sermimik misissuisut

Issittup Ukiuinut atatillugu ippassaq unnukkut Radioavisimi oqaluttuaraarput Europami nunat ilisimatusartussanut aningaasaliiniarnertik paamaarutsigigaat allaat Kalaallit Nunaanni Issittup ukiuinut atatillugu suliniutit kinguartoorlutik. Ilisimatusarnerilli arlalissuit ingerlallualereerput, soorlu sermersuup aalaakkaanera pillugu danskit ilisimatusarnerat.

- Sermimik misissuilluni aappaagu qillerinissaq suliffeqarfissuup IPY-p piareersarlugu aallarnisareerpaa, ilisimatusarnermi ataqatigiissaarisoq, Issittuni Pissutsinik Ilisimatusarfimmeersoq, Henning Thing oqarpoq, nangillunilu:

- Inuit arfineq pingasut sermimik misissuilluni atortunik aallerlutik sapaatip akunnerini pingasuni siusinnerusukkut qilleriviusimasumeereerput, qilleriviusimasoq taanna Nord-grip-imik taaneqartarpoq, atortorisimasallu tassanngaanniit avannamut-kimmut 375 kilometerinik ungasitsigisumukaanneqassapput. Atortut nussorfissaat taaguuserneqarpoq Neem. Ilisimatusartut IPY-meersut sermersuarmi tammaarsimaarfissartik nappareerpaat, aqagulu aaneqassapput. Tamaanilu tassa aappaagu ulapaartoqassaqaaq.

Issittup Ukiui 2009-mi marsip ulluisa aallaqqaataata tungaanut ingerlanneqartussaapput, ilimagineqarporlu ilisimatusartut nunanit tamaneersut katillugit 123-t Kalaallit Nunaanni Kalaallit Nunaatalu eqqaani ilisimatusassasut.