Issittup Ukiua: Ti koruuni nutaaq

februaarip 23-at 2007 12:23

Nanoq sikumit kaanngalersumit sikutamiittoq.

Silaannaap allanngoriartornerata sammineqarneranut takussutissaq erseqqilluarpoq, aningaaserivissuullu Nationalbankip Issittup Ukiuinut atatillugu aningaasanut arlalinnut saqqummersitassaannut arlaliusunut ilisarnartuulluni.

Aningaasaq saqqummersinneqartoq siulleq – ti-koruuniusoq – ataasinngorpat saqqummersinneqassaaq, saqqummersitallu tulleriiaat kingullersaat 2009-mi saqqummissalluni.

Nanoq aningaasamiittoq kalaallimit eqqumiitsuliortumit Niels Motzfeldtimit suliarineqarpoq.

Aningaaserivissuup Nationalbankip nannup assitaliunneqarneranut pissutaanerarpaa, nannup kalaallit kulturiannut pingaaruteqarnera kiisalu nunatsinnut ilisarnaataanera.

Aningaasat - 10 koruunit - nannumik ilisarnaatillit 1,2 millioninik amerlassuseqartussat aningaasanut kaaviiaartinneqartunut ilaassapput. Taamaattorli katersisartunut immikkut kuultinik sølvinillu aamma saqqummersitsisoqassaaq.

Aningaasaq kuulti kalaallit kuultiutaannit kuultisiorfimmit Kujataaniittumit Nalunameersuussaaq. Aningaasaq kuultiusoq 1000 koruunimik naleqassaaq 6000-inngorlugulu saqqummersinneqassalluni. Taanna 2.500 koruuninik akeqassaaq.

Aningaasaq sølviusoq 100 koruunimik naleqassaaq, 300 koruuninillu akeqassalluni.

Aningaasaq sølviusoq 50.000-inngorlugu saqqummersinneqassaaq.

Kunngissaq Frederik Issittup Ukiuinut illersuisutut marsip aallaqqaataani Københavnimi Illu Atlantikumi ammaanersiornermi peqataassaaq.