Issittup sineriaa sukkanerujartuinnartumik neriorneqarpoq

Issittup sineriaata neriorneqarnera kingunipiloqarsinnaavoq, pinngortitami ataqatigiinneq sunnerneqarsinnaammat, soorlu aamma Canadap, USA-p Sibiriallu  avannarpasinnerusortaani inuiaqatigiit aningaasaqarniarnikkut eqqorneqapilussinnaasut. Aviisip Alaska Dispatchip nittartagaani tamanna atuarneqarsinnaavoq.

Northwest Territoriesip, Yukonip, Alaskap Sibiriallu kangimut avannarpasinnerusortaata sineriaa eqqorneqarnerpaapput.

Sinerissap ilaa ukiup ataatsip ingerlanerinnaani 8 meterit tikillugit tunuariarsimavoq. Issittup sikuata aakkiartuinnarnera sinerissap sukkanerusumik neriorneqarneranut pissutaavoq, agguaqatigiissikkaannilu sineriak meterip affaanik ukiup ataatsip ingerlanerani tunuarsimavoq.

Ilisimatuut 30-t nunanit assigiinngitsunit qulininngaanneersut Issittup sineriaanik misissuisimapput, inernerillu atuagassiami Estuaries and Coasts-imi saqqummersinneqarlutik.
Ilisimatuut assersuutigalugu Alfred Wegener Institutimeersut misissueqataasimapput.

Issittup sineriaa 100.000-it kilometerit sinnerlugit isorartutigisoq ilisimatuut misissorsimavaat, imaluunniit Issittup sineriaata sisamararterutaata missaa misissuiffigisimallugu.