Issittup silaannaata allanngoriartornera umimmannut sunniuteqartoq

Nunat issittut silaannaata allanngoriartornera umimmannut aamma sunniuteqarpoq.

Danmarkimi Avatangiisinut misissuisarfiup paasisimavaa ukiup silaa Tunup avannaani umimmannut nerisaannullu aasaanerani sunniuteqartartoq.

Ukiuunerani apilluarsimatillugu aput arriinnerusumik aakkiartortarpoq, naasoqarneralu allanngorarnerulersarluni. Umimmaat naasut naaffigisaanni katersuuttarput nerisassaminnillu unamminerulersarlutik.

Ukiukkulli aputeqannginnerusimatillugu naasut assigiiaarnerusumik naasarput, umimmaallu nerisassarsiorfigisinnaasaat annertunerusarluni. Sumiiffinni siaruarsimanerusarput, eqimattanilu ikinnerunertik pissutigalugu nerisassaminnut unamminnginnerusarlutik.

-Misissuinitta takutippaat silaannaq annikitsuinnarmilluunniit allanngoraluaraangat pinngortitaq sukkasuumik sunnerneqartartoq, DMU-mi ilisimatusarnermi professori Mads C. Forchhammer oqarpoq.

Misissuinerit atuagassiami Ecology-mi saqqummersinneqaqqammerput.