Issittup silaannaa suli allanngorneruvoq
Silaannaap allanngoriartornerata issittumut kinguneri Ruslandip avannaarsuani Chukotkami najugaqartunut inunnut maanna sunniuteqalereerput, allaat uumasut taavani siornagut takuneqarsimanngisaannartut nassaassaalersimallutik, taama misissuinerit kingulliit takutitsipput.
Ruslandip avannaarsuani naggueqatitsinnik Chukchinnik apersuilluni misissuineq Pinngortitaq pillugu nunarsuaq tamakkerlugu suliniaqatigiiffissuarmit World Wildlife Federationimit aaqqissorneqarpoq.
Ruslandip avanaarsuani sikuusarnera ukiuuneranilu aputeqartarnera qaammammik imaluuniit qaammatit marluk sinnerlugit sivikinnerusalersimavoq.
Piniartoq naggueqatitsinnit Chukchinneersoq 71-inik ukiulik Magtagin misissuisunut oqaluttuarpoq Chukotkami septembarimi ukialersaraluartoq ukiuni kingullerni aatsaat novembarimi ukiartalersimasoq.
Piniartoq alla Anatoly Ranav-tagin 64-inik ukiulik oqaluttuarpoq siornagut ukiuunerani sila assut issillunilu unerisimanerusaraluartoq ukiuni kingullerni assut anorersuarajunnerulersimasoq, ullorpassuarni persertarluni ukiuinnarsuarlu manngullunilu sialussuartalersimalluni.
Ruslandip avannaarsuani uumasoqalersimavoq siornagut taavaniissimanngisaannartunik. Soorlu nunani kiannerusuni uumasuusut tuttorsuit, qitsuarsussuit, kiggiat qappiillu kiisalu timmissat nunani kiannerusuniittartut nassaassaalersimallutik.
Aammaattaaq aasanera tamaat sikumi siornagut puisinnartoqarsinnaasarsimagaluarpoq massakkulli juuniuliinnartoq sikuertalersimasoq Chukotkami inuit Pinngortitaq pillugu nunarsuaq tamakkerlugu suliniaqatigiiffissuarmit misissuisumut oqaluttuarput.
