Issittup sikua misissorneqassaaq

Canadamiut umiarsuaat sikusiut ”Amundsen” atorlugu misissuisoqarpoq.

Ilisimatuut Tuluit Nunaanni ilisimatusarfissuarmit University of Plymouth-imeersut umiarsuarmut taassumunnga ilaallutik misissuitinneqarput.

Tuluit tv-qarfissuat BBC News taama allaaserinnippoq.

Sullualummi immap naqqa misissuiffigineqarpoq. Taamaalilluni siornatigut ilisimasassarsiorlutik angalaartarsimasut qanoq ilinikkut iluatsitsisarsimanersut iluatsitsisarsimannginnersulluunniit paasineqarsinnaalissagunarpoq. Tassami marulluk immap naqqaniiittoq, itissutsit apeqqutaatillugit allanngorarpoq, ukiut sikoqarfiunerusut sikoqanngiffiunerusullu paasinarsisillugu.

Allatut oqaatigalugu: Silap allanngorarnera ilisimatuunut paasinarnerulersinnaavoq, silalu siunissami qanoq ikkumaarnersoq siulittuutigineqarsinnaalissagunarluni.

Misissuinissanut atatillugu Islandip avataani misissueqqaartoqarpoq, Issittullu imartaani kingusinnerusukkut misissuisoqalissaaq.