Issittup nunataa soqutiginartunik peqarpoq
Nunarsuarmi aatsitassat atortussiassaasut atorfissaqartinneqartut 25%-ii Kalaallit Nunaanni uninngatsinneqarput. Taakkulu saniatigut aatsitassat qaqutigoortunit atomit allattorsimaffiani nr.57-imiit 71 tikillugu allassimasut aamma pigineqarput. Aatsitassat qaqutigoortut taakku tamarmik magneteqarnertik assigiissutigaat. Taakkulu elktronikkiusunik sanaartornermi atorneqartarput.
-Kineserit aatsitassamut tassunga maanna kisiartaallutik kisermaassisuugaluarput, tamatumanilu akit, kikkullu atuisinnaanerat kisimiillutik aaliangertarlugu. Maannali Kalaallit Nunaanni aatsitassap assinganik nassaartoqarnera pissutinut allanngortitsissaaq. Kineserit siunissaq ungasinnerusoq eqqarsaatigalugu pilersaarusiorluartarput, taammaakkaluartorli maanna nassaartoqarnerani aatsitassamik kisermaassisuunerat navianartorsiortinneqarpoq, Sakkutooqarfimmi pisortaq kontreadmirali Niels Christian Wang taama oqarpoq.
Kalaallit Nunaanni aatsitassarsiornermut tunngasuni aaliangiinissaq Naalakkersuisuniikkaluartoq, isumannaallisaanissaq, nunanut allanut kiisalu illersornissamut politikki eqqarsaatigalugit Danmark tamatumani ilanngussinnaavoq. Tamannalu naalagaafferqatigiinni aaqqinneqanngippat siunissami ajoqutinngorsinnaavoq.
-Danmarkimit aaliangerneqarumaarpoq qanoq iliortoqarumaarnera.Kalaallit Nunaanni aatsitassanik qaqutigoortunik nassaartoqarnerani isumannaallisaanermut politikki sunniuteqartussaassaaq.Tamattumik tamatumani isumaqatigiissimanissaq inatsisaasunillu maleruaanissaq pingaaruteqartorujussuussaaq. Sermimmi aakkiartornerani suliassaq annertunerujartuinnartussaassaaq, uagullu sakkutooqarfimmiit sapinngisarput tamaat Danmarkimut Kalaallillu Nunaannut sullissilluarniarpugut, kontreadmirali Niels Christian Wang taama naggasiivoq.
Aatsitassanit qaqutigoortunit nassaarineqartut ukuupput:Lantham, Cerium, Praseodym,Neodym, Promethium, Samarium, Europium, Gadolinium, Terbium, Dysprosium, Holmium, Erbumium, Thulium, Ytterbium aamma Lutetium.
