Issittup kiattullu nunai suleqatigiilerput

Issittumi kiattunilu nunat suleqatigiillutik Nunarsuatta kiatsikkiartornera nunanullu assigiinngtisunut qanoq sunniuteqarsinnaanera pillugu nunarsuarmi naalakkersuisut siuttuinut paasisitsiniaanissaq aallartinniarneqalerpoq.

Nunarsuarmi CO2-qarpallaarluni silaannaap kiatsikkiartornerata kingunerisaanik sermersuup aakkiartornera sukkaneruleriartorpoq. Taamaammat nunani kiattuni qeqertaaqqat ilaasa, soorlu Manerassuup aammalu Indiap eqqaani Maldiiverit ilaanniittut Tuvalu-p qeqertai imaluunniit Marshal-p qeqertai morsukkiartulerneranik kinguneqarsinnaalluni.

- Taakkuulluta mianernarnerpaanik nunaqarpugut, taamaammat suleqatigiikkutta angusaqarnerussuugut, ICC-p præsidentia Sheila Watt-Coultier Reuterimut taamak oqarsimavoq.

Manerassuarmiut Samoa-meersut Vanatu-meersullu aammalu Jamaica-mi Caribia-meersut ICC-p præsidentiata oqaloqatigereerpai. Qaammatip tulliani FN-i Buenos Aires-mi ataatsimiilerpat amerlanernik Sheila Watt-Coultier oqaloqateqassamaarnerarpoq.

Amerikamiut naalakkersuisuisa CO2-mik atuisoqarpallaarneranik annikillisaasoqarniarneranik akoorusunnginnera eqqartuussivilersuinermik kinguneqarsinnaavoq. Qeqertaaqqat pukkunnerusumiittut eqqartuisimapput Washingtoni eqqartuussivilersuunniarlugu. Aamma ICC Washington-mut saaffiiginninniarpoq oqariartuutigalugu, silaannaap pissusissarinngisaminik kiatsikkiartornera tassaasoq nunat inuiisa pisinnaatitaaffiinik unioqqutitsineq.