Issittup kiatsinnermigut CO2 aniasoq ilanngartorsinnaavaa
Ilisimaatuulli allat ilimagaat silap pissusaata allanngoriartornerata kingunerisaanik Issittup nunataani naasoqarnerulissasoq, CO2-millu aniatitsineq annikillisarneqarsinnaalissalluni.
The Canadian Pressip nittartagaani taama allaaserinnittoqarpoq.
Issittumi naasoqarnerulernera pissutigalugu CO2 aniatitaq ukiuni tulliuttuni 15-ini annikinnerussasoq ilimagineqarpoq, kingornali killup tungaanut pinngortitap pissusaa ingerlalissasoq:
- Naasoqarnerulernerata kingunerisaanik CO2 aniatitaq annikinnerussangatinneqarpoq. Nunali qeriuaannartoq allanngorartuuvoq, CO2-li aniatitaq piffissap ingerlanerani ima annertutigilersimatigissaaq naasut CO2-mik milluaanerat naammannavianngitsoq, pinngortitami pissuseqatigiinneq pillugu University of Floridami professori Ted Schuur oqarpoq.
Alaskami, Canadami, Sibiriami Europallu avannarpasinnerusortaani nunap qeriuaannartup annertunersaa suli aakkiartunngitsoq, Ted Schuurip erseqqissarpaa, ukiulli 100-t tulliit ingerlanerini ilamernga kujataaniit aakkiartulerumaartoq. Nuna qeriuaannartoq 13 million kvadratkilometeritut annertutigaaq.