Issittup imartaatigoorneq akilersinnaasorinngilaat
Arild Moe aamma Øyestein Jensen Rusland aammalu umiarsuit angalasarnerinik immikkut ilisimasaqartuusut, EU-p inatsisartuini ilaasortanut nalilersuinerminnik saqqummiussipput. Taakkua saqqummiuppaat umiarsuit Europameersut Asiami nunat aqqusaaqqaarnagit issittup imartaatigut ingerlaarunik piffisamik aningaasanillu sipaaruteqarsinnaanersut.
- Russit ukioq naallugu issittup avannaata imartaatigut umiarsuartigut angalasinnaanermik takorluuinerat ukiuni tulliuttuni qulini pisinnaanissaa piviusorsiunngilaq, Moe amma Jensen taama inerniliipput, taamalu inerniliinerminni Rusland Canadalu avannaqqullugit umiarsuarnik ingerlaarsinnaanermik isumalluarlutik takorluuisut pakatsisippaat.
Saqqummiunneqartut siusinnerusukkut saqqummiunneqartartut allat, soorlu ilisimatuut, politikerit niuertullu saqqummiuttarsimasaat avannaqqussilluni ingerlaartarsinnaanermut isumalluartut akerlilerpaat.
Norgemiut taakkua marluk Sullualukkut umiarsuit akilersinnaasumik ingerlaartarnissaat pisinnaannginnerarpaat, isumaqarlutillu Kangianut Aqqut taamaallaat aasaanerani annikitsumik ingerlaarfigineqartarsinnaasoq.
Taakkualu aamma tikkuarpaat Rusland umiarsualivinnik pisariaqartinneqartunik umiarsuarnillu sikusiutinik issittup imartaatigut ingerlaartunik ikiusartussanik naammattunik aningaasaliisimanngitsoq.
Umiarsuit Sullualukkut Kangiatalu Aqqutaatigoorlutik ingerlaalersinnaanerat soqutigineqarpoq, taakku aqqutigalugit umiarsuartigut ingerlaarfiit Suezip ikerasaa taamatullu Panama-p ikeraasaa pingitsoorneqarsinnaammata.
Issittup imartaatigoornermi assersuutitut taaneqarpoq, umiarsuit Hollandimi Rotterdamimiiit Japanimi Yokohamamut ingerlaartarnerat affaannarmik sivikillineqarsinnaasoq.
