Issittup imartaata sikua annikilliartuinnarlunilu saaligaluttuinnartoq
Tassa sikup qaammataasat atorlugit 1970-ikkulli naajartulerneranni uuttortarneqartalermalli aatsaat taama pisoqaanngitsigalunilu saatsigisoq misissuinerit takutippaat.
Aviisip Alaska Dispatch Newsip nittartagaani tamanna atuarneqarsinnaavoq.
Sikup maanna piusup 70 procentiata ukiup kingulliup ingerlanerani pinngorsimanera, sinnerilu 30 procentit pisoqaanerusoq, immikkut ilisimasallit National Snow and Ice Data Centerimeersut nalunaarutigaat.
Ukiup kingulliup ingerlanerani misissuinerit taama inernilerneqarput, immammi sikuata annertunersaa 1980-ikkut qiteqqunneranni ikinnerpaamik ukiunik marlunnik pisoqaassuseqarpoq.
Sikup pisoqaanersartaa, tassa siku ikinnerpaamik ukiunik tallimanik pisoqaassusilik, maanna aatsaat aamma annikillisimatigaaq, tassami sikup qaammataasat atorlugit uuttortarneqartup taamaallaat 3 procentia taama pisoqaatigimmat.
- Sikup Issittup imartaaniittup sivisuallaamik ataneq ajornera paasineqarpoq, immikkut ilisimasallit nalunaarusiaanni atuarneqarsinnaavoq, sikullu siornatigut pinngortartup ikiut qulit tikillugit atasarnikuunera tikkuartorlugu.
