Issittup imartaani sikup aakkiartornera sukkavoq
Siunissamut missingiutit nikallunganarput. Issittut imartaani sikup aakkiartornera maannamut ilimagisasimasuniit sukkaneruvoq. Nalunaarusiami SWIPA-mik taguutilimmi tamanna paasinarsivoq. SWIPA Issittumi Siunnersuisoqatigiit immikkut ilisimasalinnik suleqatigiittitaatta AMAP nalunaarusiaraa, taannalu ataatsimeersuartunut saqqummiunneqassaaq.
Sikup sannaanik ilisimatooq, professor Dorthe Dahl-Jensen, nalunaarusiami allaaserinnittut ilagaat.
- Issittup kiatsikkiartornera sukkaqisoq ukiuni kingullerni takuarput, Dorthe Dahl-Jensen oqarpoq.
Nalunaarusiami siullermeerluni uppernarsarneqarpoq, seqernup qinnguai utersaarnikinnerulersisut, tamannalu sikup aakkiartornerata sukkanerulerneranik kinguneqarpoq.
- Aput qaqortuusoq nungukkiartortillugu sumiiffiit qernertumit qalipaateqaleriartoraangamik, suli kiassanneqarneruleriartortarput, silalu kianneruleriartorluni. Paasisaq taanna nutaajuvoq. Taamaalinissaa siulittortareerparput, maannali ilumut taamaattoq takuarput, Dorthe Dahl-Jensen oqarpoq.
Tassalu ima pisoqarpoq, siku annikinnerulerioartormat issittup imartaata seqerngup qinnguuanit nukik tigoorarsinnaanerulerpaa. Nukik taanna ukiakkut immap kiannerulerneratigut malunniuttarpoq. Nunami aamma taamatut pisoqartarpoq.
- Taama pisoqarneratigut immat qaffakkiartupiloortut takusinnaavagut. Maannakkorpiaq missingiutigineqarpoq, immat 2100-mi 90 centimeteriniit 1,6 meterit tikillugit qaffassimassasut. Kisitsisillu taakkua ukiualuit matuma siornatigut saqqummiunneqartunit qaffasinnerupput, Dorthe Dahl-Jensen oqarpoq.
Immat 1,6 meteri tikillugu qaffappata, tamanna nunarsuarmiut ilarpassuinut peqqarniittumik kinguneqassaaq. Inuit 150 millionit immap qaavanit 1 meterimik pukkinnerusumi najugaqassapput. Naallu Kalaallit Nunaanni illoqarfiit ataatsimut isigalugit qaffasissumi inissisimagaluartut, Kalaallit Nunaanni aamma eqqumasoqartariaqartoq, Dorthe Dahl-Jensen oqarpoq:
- Sumiiffinni annertuuni sikuerukkiartornera aatsitassanik nassaarnissamut isumaqarpoq. Aamma erngup nukinganik innaallagissiorfiliorniarnermi sumi kuupit imermik pilersorneqarluarnersut eqqumaffigisariaqarpoq. Taamaammat sumiiffiit qanoq ineriartorneri paasissallugit Kalaallit Nunaannut pingaaruteqarpoq, Dorthe Dahl-Jensen oqarpoq.
Silallu allanngoriartornerata issittup inuinut kingunissaai ataatsimeersuarnermi pingaartuupput. Peqataasut ilaat, ICC-meersoq Parnuna Egede ima oqarpoq:
- Silap allanngoriartornerata kinguneranik ulluinnarnik atukkat allangornerannik Issittoq takussuutisaqarnerpaanut ilassaaq.
Aamma uagut siammarluta inuugatta eqqugaanerpaqassuugut. Taamaammat silap allanngoriartornera ilungersunartutut isigaarput, Parnuuna Egede oqarpoq.
Naalakkersuisuni ilaasortat Jens B. Frederiksen aamma Anthon Frederiksen ataatsimeersuartunut malinnaapput. Soorlu aamma naalakkersuisoqarfinnit arlalinnit, Ilisimatusarfimmit, ICC-mit aamma Nunatsinni silap pissusaanik misissuisoqarfimmit peqataasoqartoq.
